Hnathawh theih zirchiang peihlo ah ngai

Mizoram Pradesh Congress Committee (MPCC) Communication Department chuan Agriculture Minister, C. Lalrinsanga thusawi chuan mahni hnathawh theih dan tur pawh zirchiang peihlo a ni tih chiang takin a tilang niin an sawi.

Nimin a thuchhuah an siamah MPCC Communication Department chuan Agriculture Minister C. Lalrinsanga hian May 13, 2019 khan Hnam Run-a an party Chhûng Inkhawma thu a sawina ah Fall Armyworm chungchang sawiin, ‘Nghasih ruama hmuh a nih tirh khan kal turin ka insiam vek tawh a, mahse Model Code of Conduct vanga buai ka hlauh avangin ka \hulh leh,’ a ti nia sawiin, hei hian mahni hna thawh theih tur pawh zir chiang peihlo a ni tih chiang takin a lantir nia an ngaih thu an sawi a. “MNF sawrkar hmasa lama Dy. Speaker leh Minister meuh lo ni tawh, tuna Cabinet Minister nihna chelh zui thei Pu C. Lalrinsanga'n Model Code of Conduct dan a hre lo hi thil awih harsa tak a ni, ‘Fall Army Worm a puang tih report-na hmasa Nghasih khua hi ka tlawh peih lo’ ti mai se, thu awihawm loh lutuk chhuanlam hetianga siam mai mai awih turin Mizo mipuite kan à tawh lo tih hria se kan duh a ni,” an ti a. “Fall Armyworm puang avanga loneitute chhawmdâwl tura Minister zin turin Model Code of Conduct a hlauh em em laia Thenzawl Golf Course tlawha nuam chên tura zinte leh Lok Sabha inthlan vote thlâk mêk laia New Delhi-a Minister zin lawi si te hian chhuanlam siamna atan lek Model Code of Conduct hi an hmang tih a lantir chiang hle,” an ti bawk.