Lirthei leh kawngpui-a chetsualna laka fimkhur a pawimawh zia inzirtirna Hapta hawnna neih a ni

Lirthei leh kawngpui-a chetsualna laka fimkhur a pawimawh zia inzirtirna Hapta, Road Safety Week vawi 30-na chu nimin a\ang khan hman \an niin Serchhip-ah pawh he Hapta hawnna hi Serchhip District Bawrhsap hova neih a ni a, thla thar June 2 thleng he Hapta hi hman a ni ang.

Serchhip DC’s Conference Hall-a Road Safety Week vawi 30-na hawnna hunah hian District Bawrhsap, Sangchhin Chinzah chuan he Hapta hi lirthei leh a kaihhnawih laka chetsualna laka kan him theihna tura kan mawhphurhna kan hriatna atan hman ni thei se a duh thu sawiin, he Hapta hman ah hian \halai zawkte himna ngaih pawimawh a nih thu a sawi a. Tunhnaiah kumtlinglo a lirthei khalh an tam thu leh hei hi a hlauhawm thu sawiin, Dan in a phal loh a nih avangin chetsualna thleng palh ah thiam chan theih a nih loh thu a sawi a. School Uniform ha chunga lirthei khalh \hin chu tih loh tur a nih thu sawiin, he huna kalkhawm zirlaite chu kum an tlin hnuah chauh lirthei khalh turin a chah bawk. Hei bakah hian Two Wheeler khalhtu zingah Helmet khum ngai pawimawh lo an awm \hin chu thil pawi tak a nih thu pawh sawiin District Bawrhsap chuan, Traffic Police man hlauh vang chauha Helmet hi khum tur a nih loh thu leh chetsualna thleng hleka hliam na tak leh thihna hial thleng thei laka kan himna tura khum zawk tur kan nih thu a sawi a. Lirthei laka chetsualna laka fimkhur a \ul zia inzirtirna hi Hapta khat chhung chauh ni lo, engtik lai pawha inzirtir reng \ul a nih thu a sawi bawk.
Serchhip District Transport Officer, B. Lalrinsanga kaihhruaia Road Safety Week hawnna hunah hian Serchhip Addl. SP, PC. Lal\anpuia chuan lirthei chetsualna laka kan him theihna tura thil pawimawh hrang hrangte sawiin, khawvel pumah kumtin Road Accident avanga nunna chan mi nuai 13.5 chuang an awm thu leh hliam tuar nuai 50 chuang an awm thu sawiin, India ramah pawh kum 2014-2019 chhungin Road Accident avangin mi nuai 7.9 an thih thu a sawi a. Mizoram-ah pawh hemi hun chhung hian Road Accident-a thi mi 400 an awm laiin tualthah kaihhnawih a thi chu mi 179 awmin Serchhip District-ah pawh tualthah kaihhnawih ah mi 9 an thih laiin Road Accident avangin mi 14 lai an thih thu a sawi a. Heta \ang hian Road Accident chu nunna tam tak latu a nih tih a chian thu sawiin, Road Accident-a thi lo tura kan zavaia kan fimkhur tlan a \ul thu a sawi a. Hemi atan hian sawrkar Department hrang hrang, lirthei neitu leh khalhtu leh mipui ten mawhphurhna kan neih \heuh thu pawh sawiin, inkhawm-a kal tur zingah lirthei ke hnih nei khalh chunga Helmet khumlo an awm fo thu pawh a sawi a, Kristian Dan zawm ni turin kalkhawmte chu a chah bawk.
Road Safety Week hi India ramah chuan kum 30 kalta a\ang khan hman \hin ni mah se Serchhip District-ah chuan kum 2004 a\angin hman a ni a, Serchhip District-ah hian kumtin hman ni lovin kumin hi \um 7 hmanna chiah a ni a, he Hapta hi February thla ah hman \hin ni mah se kumin hian Lok Sabha inthlanpui te neih a nih avangin a hman hun hi sawn hret a ni a, he Hapta hman ah hian thupui hrang hrang hman \hin niin kumin hian ‘Lamlian a himna hi nun himna a ni’ tih chu thupui atan hman a ni.
He Hapta hi June 2 thleng hman tura ruahman niin Hapta hman chhung hian lirthei khalhtu ten Dan an zawm \ha em tih enfiahna chu ngawrh taka neih tura ruahman a ni a, hei bakah hian lirthei khalha eizawngte tan Training pawh buatsaih tum a nih bakah Zoram Drivers’ Union (ZDU) Sub-Hqrs. Serchhip nen \angkawpin Driver \ha thlanna pawh neih leh tura ruahman a ni bawk.
Nimin a he Hapta hawnna hunah hian Serchhip-a sawrkar Department hrang hranga hotute bakah ZDU hruaitu te, lirthei khalhtu pawl hrang hrang hruaitute bakah MJA Member te an tel a ni.

Comments

Chhiar Hlawhte