Mizoram Lok Sabha MP thar atan MNF Candidate C. Lalrosanga thlantlin a ni

Lok Sabha inthlanpui a Vote tla te chu nimin khan India ram hmundangte rualin Mizoram-ah pawh chhiar a ni a, MNF Official Candidate, C. Lalrosanga chu thlantlin niin EVM-a Vote tla zawng zawng a\angin Vote 8307 in a hneh a, Postal Ballot/ETPBS-a Vote tla te nen an inhnehna hi la danglam leh hlek tura ngaih a ni.

April 11, 2019-a Mizoram Lok Sabha inthlanpui neiha Vote tla te nimin a Mizoram  District hrang hranga chhiarah hian harsatna leh buaina awm lovin tluang taka chhiar a ni a, he thu buatsaih lai hian ETPBS (Postal Ballot)-a Vote tla te 3211 chhiar zawh la ni lovin he inthlan ah hian EVM-ah vote 5,00,374 a tla bawk a. EVM-a Vote tla hriat theih chinah C. Lalrosanga hian Vote 2,23,509 (44.99%) hmuin amah hnaih bertu Congress leh ZPM thlawp Independent Candidate, Lalnghinglova Hmar chuan Vote 2,15,202 (43.32%) a hmu a, an inthlauhna hi Vote 8307 a ni a. BJP Candidate, Nirupam Chakma chuan Vote 27,989 (5.63%) hmuin Independent Candidate, Lalhriatrenga Chhangte chuan vote 12,467 (2.51%) a hmu bawk a. PRISM Party Candidate, TBC. Lalvenchhunga chuan Vote 13,211 (2.66%) hmuin Independent Candidate, Lalthlamuani chuan Vote 1909 (0.38%) a hmuh bakah NOTA-ah vote 2493 (0.5%) a tla bawk a ni.

Mizoram hian kum 1972 a\angin Lok Sabha MP hi neiin hemi kum hian inthlanna hmasa ber chu neih a ni a, Lok Sabha inthlanpui hi tun \um nen vawi 13 nei tawhin mi 8 te chu Lok Sabha MP atan hian thlantlin an lo ni tawh a, tun \uma Mizoram Lok Sabha MP atana thlantlin tlak, C. Lalrosanga hi March ni 1, 1957 khân Kuli-kawn, Aizawl-ah a lo piang a. A pa chu C.L. Tlanthanga (L) niin a nu chu Maryna-i a ni a, unau 7 niin amah hi a upa ber a ni. Kum 1976 khan Evelia Lalthanpari Zadeng nen inneiin fapa 1 leh fanu 4 an nei a, tunah hian Aizawl Tuikual South-ah an khawsa mek a ni.

Zirna lamah Synod High School, Aizawl a\angin kum 1972 khân HSLC a pass a. Shillong College-ah PU (Sc) a zir hnuin Pachhunga University College, Aizawl-ah BA History (Hons) a zir lehin a zir lai hian sawrkar-ah a lut a, AIR Aizawl-ah thawkin kum 1982 khân UPSC kaltlangin Central Information Service, tunah IIS ni ta hi a zawm a. Kum 1991-ah UPSC kaltlang vêkin Indian Broadcasting Programme Service (IBPS)-ah tlingin Shillong-ah AIR North Eastern Service Director hna a zawm. Kum 1995 a\angin AIR Shillong (Main Station) Director nên kawpin kum 1998 January thlaah AIR Aizawl Station Director hna a zawm leh a. Kum 2002-ah Mizoram Sawrkâr Deputation-a zawmin Joint Secretary niin RD, School Education leh I&PR te a enkawl a. Kum 2005 March-ah DDK Aizawl Director hna thawk lehin kum 2006 a\angin AIR (NE) Region (5 States) chu DDG niin a enkawl tel bawk a. Kum 2010 khân AIR & DD inkawp atân Additional Director General (ADG)-ah a kaisang leh a, kum 2015 March thlaah Delhi-a Doordarshan Director General hna thawk lehin hei hi a pension thlengin a chelh zui ta a ni.