Zu khapna hmang dawn hnai

Mizoram-a Zu khapna dan siam thar, Mizo-ram Liquor Prohibition Act, 2019 chu naktuk ah Law and Judicial Department in hriattirna chhuahin hman \an a ni tawh dawn.

Excise and Narcotics Department hotute sawi danin Zu khapna dan hi March ni 20 khan Assembly in pawmin a hnuah Larsap pawmpuina pawh hmuh a ni tawh a. Mahse, Lok Sabha inthlanpui puan hnan a nih avangin Election Commission of India chuan tuna sawrkar dinglaiin inthlan Manifesto-a a telh a nih avangin hriattirna chhuah a khap sak a. Inthlanpui hi Vawiin ah zofel tura bituk a nih angin naktuk ah he Dan hmang \an turin hriat-tirna hi chhuah a ni dawn ta a ni. He dan hi hman \an a nih a\ang chuan Zu ruih bakah, in, kawl, lei leh hralh khap a ni dawn a, dan bawhchhia te chu na taka hrem an ni dawn a ni.

He dan kalpui, Mizoram Liquor Prohibition Rules chu duan tawh a ni a, Law Department pawmpui (vet) tura thawn a ni tawh a. Anni’n an pawmpui a, Cabinet-in a pawm hunah Assembly Dawhkan-a dah a ni ang a. June ni 12 a\anga \an tur Assembly Budget Session-ah hian House dawhkana dah hman a nih dawn leh dawn loh an hriat bik loh thu Excise & Narcotics department hotute chuan an sawi.

Kum 1984 khan Mizoram-ah Zu dawr hawn \an a ni a, hemi hnu hian khap tak tak si lo, phalrai bawk si lova hun engemaw chen a kal hnu-ah kum 1995 khan Mizoram Liquor Total Prohibition Act chu siamin  February ni 20, 1997 a\anga hmang \anin na taka Zu khap a ni ta a. Sawrkarin a rilru thlak lehin kum 2014 khan Mizoram Liqour (Prohibition and Control) Act chu siamin January ni 15, 2015-ah hriattirna chhuahin hman \an a ni a, March ni 16 a\anga Zu zawrhna dawr hawn \an a ni a. Tuna MNF sawrkar lo ding hian nikum November ni 28-a Assembly inthlan hma a an tiam angin Zu dawrte kharin Zu khapna dan hi hman leh a tum mek a ni.