Latest News

Serchhip-a Nursing School sak zawh tawh hman \angkai loh avangin a chhe nasa tawh

Serchhip-a Nursing School tur sak chu sak zawh thawkhat a nih hnuah tun thlenga luah ala nih loh avangin a building tam tak chu a chhe leh tawh.
Serchhip Chanmari Veng, Lawibual ram-a Nursing School dah turah hian School building tur leh Hostel tur chu sak niin Nursing School hi hawn ala nih loh avang leh enkawltu mumal an awm loh avangin a chhe nasa tawh hle a, he building sak hi niminpiah khan Serchhip-a Nursing Superintendent, H. Vanlalhluni leh Health Department-a thawktu \henkhat te chuan a hmunah tlawhin a dinhmun an en a ni.
    Thudawn danin Serchhip-a Nursing School sak hi a building leh a chhunga Electric wiring te chu tihfel vek ni tawh mah se mi tam takin lenna atan leh ruihtheih thil tihna atan an hmang \hin a, hei vang hian a building hnunglam leh hmalam-a darthlalang awm te chu him alawi a awm tawh lo a, hei mai bakah hian a chhung lamah Electric wiring pawh nasa taka tihchhiat niin Light an dah te bakah Ceiling Fan leh thildang te chu tihchhiata rukbo te pawh a awm a, Bathroom te pawh nasa taka sawisak a nih bakah a chung lama Tuizem an dah \henkhat te pawh a chhe tawh bawk a, hawng tura buatsaih leh a nih dawn pawhin sum tak tak sen belh a \ul leh tawh dawn a ni.
    Serchhip-a Health Department-a thawktute chuan Nursing School hi hawn thuai ni thei se an duh thu sawiin, hawn mai theih a nih loh pawhin a enkawltu tur mumal tak dah a pawimawh nia an hriat thu an sawi a. Hemi hmalam hian a huamtu Branch YMA, Chanmari Branch YMA te chuan helai hmun ruih-theih thil leh thil \halo tihna atana hmang an awm \hin chu pawi an tih thu sawiin, henglai hmun hi uluk taka enkawlpui turin Serchhip khawtlang mipuite chu an lo ngen tawh a ni.

Comments

Popular News (Last 30 Days)