ZPM leh Cogress in Vote an hloh nasa niin sawi

MNF Vice President, Dr. R. Lalthangliana chuan Lok Sabha inthlanpui neih zawh takah ZPM leh Congress \angrual in nikum inthlana an vote hmuh nena khaikhinin vote 1,10,870 lai an hloh nia sawiin, Congress tlinna chhun bial panga-ah te pawh an tla fai vek niin a sawi.

Nimin a Aizawl Mizo Hnam Run-a MNF Chhung Inkhawm ah MNF Vice President, Dr. R. Lalthangliana hian thu sawiin nikum MLA General Election khan ZPM leh Congress vote hmuh belhkhawm kha vote 3,27,016 a nih thu sawiin, kumin MP thlana an vote hmuh belhkhawm hi vote 2,16,146 a nih thu leh ZPM leh Congress hian nikum inthlan aiin vote 1,10,870 laiin an hmu tlem zawk thu a sawi a. “Kum 2018 General Election-a an Party pahnih vote share hi 53% a nih laiin tun MP inthlanah khan 43.26% chauh a ni pha a. Keini MNF erawh chuan hma kan sawn hle a, 2018 inthlan khan kan vote share chu 37.58% a ni a, tun MP inthlanah hian 44.89% zet kan hmu tling pha a ni. Party pahnihin min beihrawn chung pawhin kan vote hmuh hi a lungawithlak hle a ni,” a ti bawk.

Health Minister chuan Congress kum 10 sawrkar khan chhun-zawm tlak thiltih an nei ve nual tih sawiin, “Medical College, hmabak tam tak neia an kalsan te hi changtlung taka buatsaih chho turin chak takin hma kan la mek a. Lunglei Engineering College tur Quarters, kawng leh tui la awmlo te pawh hi buaipui a ni ang a. Kum 10 Congress sawrkar ah khan Aizawl Municipal Corporation hi a nih dan tur a ni lo nasa hle a, khawpui hmel tidanglam dawrh turin a dintu MNF ngei hian hma kan la chho dawn bawk a ni,” a ti bawk.