Lirthei khalhtute tan Dan zirhona neiin Driver \ha thlanchhuah te chawimawi an ni

Road Safety Week vawi 30-na hman mek pualin nimin khan Serchhip-ah sumdawnna lirthei (Commercial Vehicle) khalhtute tan lirthei khalh chungchanga an hriat tur pawimawh hrang hrang inzirtirna neih a ni.
Serchhip DC's Conference Hall-a Drivers Training hi Serchhip District Transport Officer, B. Lalrinsanga chuan kaihruaiin khuallian nia he hun hmanpuitu Serchhip District Addl. DC, Chuauhnuna chuan lirthei khalhtute chu zaidam taka awm tum turin a chah a. Ke-a kal te aiin lirthei khalhtute chuan midang ngaih theihlohna an neih awlsam \hin thu leh mahni remchanna lak vat vat pawh a awl \hin thu sawiin, hei vang hian midangte tana hnawksak lo tura khawsak hram hram \hin a \ul thu a sawi a. Mizoram chu tlangrama awm kan nih thu leh mi ram te anga Four Lane neih ve te chu beiseiawm a nih loh thu sawiin, kan kawngpui neih zau te pawh Double Lane te a ni phak chauh tih a sawi a, hei vang hian lirthei khalhtute chu an fimkhur tlan a \ul thu sawiin, Serchhip District chu Mizoram District hrang hrang zingah pawh Driver zahpuiawm deuha khawsa awmlohna pawl tak nia a hriat thu a sawi a. Hei hi chhawmnung zela hmasawn erawh tum zel turin a chah a. Lirthei khalh chu eizawnna tling a nih thu pawh sawiin, indahhniam lo tur leh amaherawh chu chapo taka an hna erawh thawk lo turin he huna kalkhawmte chu a chah bawk.
He hunah hian Zoram Drivers' Union (ZDU) Sub-Hqrs. President, Lalthlanthanga Chawngthu pawhin thu sawiin Driver hna chu hna bik, mi nawlpui ten an thawh theihloh a nih thu a sawi a, midangte zirtirtu an nih avangin in vawng fimkhur tur an nih thu a sawi bawk. ZDU Sub-Hqrs. President chuan kum 1959-ah ZDU chu a din \an thu leh kum 1972 a\angin anmahni pawl in Fimkhurna Hapta chu an lo hman \an tawh thu a sawi a, Driver te dinhmun hriain Revival Camping pawh a hmasa ber atan an lo buatsaih tawh thu leh Ruihhlo ngai te chhanchhuahna Home pawh Mizoram-a siam hmasa ber an nih thu sawiin, tunah hian Zuangtui-ah Damna In an neih mek thu a sawi bawk.
He training-ah hian Serchhip-a Maxi Cab, Taxi leh Auto Rickshaw drivers te telin Road Safety Week hman mek puala heng lirthei chi hrang hrang khalhtu zinga a \ha thlanchhuah te hnenah chawimawina thuziak leh pawisafai hlan an ni a. Lawmman dawngtute hi Maxi Cab-ah F. Lalbiakdika s/o Ramchhana, Vengchung, Taxi-ah Rosangliana Ralte s/o R. Thanmawia (L), Chhiahtlang Kawn Veng leh Auto Rickshaw-ah B. Lalzamliana s/o B. Bawlliana, Vengchung te an ni.
Nimin a training-ah hian chawhnu lamah thupui hrang hrang hmangin he huna kalkhawmte hi zirtirna pek an ni a, B. Lalchhuangkima, MVI Serchhip; R. Zothansanga, Enforcement Sub-Inspector leh KC. Hmingliana, Traffic Police ten kalkhawmte hi zirtirna an pe a ni.

Comments

Popular posts from this blog

PAN CARD an tih teh fo hi - Laldinpuia