MP inthlan Vote chhiar chhung a rei dawn tih sawi

Lok Sabha Inthlanpui leh Aizawl West-I MLA Bye-Election neih zawh takah Electronically Transmitted Postal Ballots System (ETPBS) a vote tla te chhiar turin hun a awh rei dawn thu Returning Officer, Vanlalngaihsaka chuan a sawi.

Inthlanpui a vote tla te chhiar turin District hrang hrangah inbuatsaihna kalpui mek a ni a. Nimin khan Aizawl-a Planning Conference Hall-ah ETPBS vote chhiar tur chungchang thuthar lakhawmtute mite hrilhfiahin RO, Vanlalngaihsaka chuan Service Voters ten Vote thlakna atana an hman, ETPBS chu Pre-Counting neih tur a nih avang leh QR Scanner hman zel a ngaih dawn avangin Vote pakhat chhiar chhung hi minute khat ai pawhin a rei thei tih a sawi a. “ETPBS hi Vawiin thleng hian 3119 dawn a ni tawh a, vote chhiar \an hma thleng dawn belh zel theih a ni,” tiin thuthar thehdarhtu ten Vote hmuh zat an hriat zung zung theih nana ruahmanna an siam te pawh a sawi bawk.

Mizoram Lok Sabha inthlanpui neiha Vote tla te chhiar turin inbuatsaihna kalpui mek zel a ni a. Nimin khan Aizawl-ah he inthlanpuia Returning Officer hovin Lok Sabha inthlanpuia MP Candidate te leh an Agent te chuan inthlanpui neih zawh tak leh Vote chhiar tur chungchang hi an sawiho a, Vote chhiar tura Service Voters te Vote chhiar dan tur chungchang pawh inhrilh-hriatna neih nghal a ni bawk.

Lunglei-ah pawh nimin khan Constituency 7-a vote tla te chhiarna atan Counting Agent te tan Convention Centre Hall, Lunglei-ah training neih a ni a, Lunglei-ah hian Saikuti Hall Ground Floor-ah Lunglei District huamchhunga Constituency 7 tan Vote chhiarna turin Counting Centre 7 siam niin Counting Table 60 dah a ni anga, Counting Supervisor 60 leh Reserve 12 an awm anga, Asst. Counting Supervisor 60 leh Observer puitu tur mi 7 dah an ni bawk.

Kolasib-ah hian MP inthlanpuia Vote tla te chhiar tur hian inbuatsaihna peihfel a ni tawh a, nimin khan Micro-Observer, Counting Supervisor leh Counting Asisstant te tan Final Briefing neih niin Vote chhiar ni a Media te hriat tur leh zawm tur thil chi hrang hrang sawi zau na hun buatsaih a ni bawk. Kolasib-ah hian Govt. Kolasib College Multipurpose Hall-ah Counting Hall pathum (3) siamin Counting Table 30-ah Vote tla te hi chhiar a ni ang.

Champhai-ah pawh nimin khan Vote chhiar huna duty tur Micro-Observer mi 32 leh Counting Supervisor leh Assistant mi 34 ve ve te tan training neih leh a ni a, hei bakah hian Media te tan Lok Sabha inthlan vote chhiar huna Media-te zawm tur leh ECI kaihhruaina dan chung-changa inzirtirna hun buatsaih ni bawkin Media Room-a inthlan result pekchhuah dan turte pawh he hunah hian tarlan a ni bawk.