Lenkawl

Tunlai hian India ram hmun hrang hrang ah Influenza natna a leng mek a, he natna hi Mizoram chhungah pawh hmun hrang hrangah vei an awm tih hriat a ni a, Lunglei District ah pawh School pahnih lai mai hrileng avang hian khar alo ni tawh a, he natna hi inkaidarh theih anih vangin mipuite kan fimkhur nan a hnuaia invenna tur te hi zawm ngei turin kan inhriattir a ni.

Nimin khan Serchhip-a DAY-NULM hnuaia District Executive Committe chu thukhawmin DAY-NULM hnuaia hmalakna kal mek te an thlirho a ni.

Serchhip District-ah dan lova kuhva lakluh leh phurh khapna thupek tihchhuah thar a ni.

Mizoram sawrkar chuan kumthar 2026 atan Mizoram Sawrkar hnuaia thawktute tan Office Chawlh Ni (Holiday) siam thar leh ta a, heng bakah hian Inrinni leh Pathianni zawng zawngah Office khar a ni bawk ang.

Kumin hian Mizoram hmun hrang hrangah Rawthing a tam leh mek a, hriat theih chinah Rawthing Tam avanga Sazu puang avangin khaw 138 velin harsatna an tawk tawh a, Lunglei District chhunga khaw thenkhat ah chuan tunkar Zirtawpni khian Sazu hrai runpui (mass poisoning) kalpui turin ruahmanna siam a ni.

Mizoram Poor Federation chuan Mizoram Universal Healthcare Scheme (MUHCS) leh CM Special Package-a sawrkar hmalakna fakin, Synod Hospital-in MUHCS a zawm tur chu miretheite tan thil lawmawm tak a nih thu an sawi.

Kumin August thla khan Mizoram sawrkar chuan Taxation Department kaltlangin Chhiah chi hrang hrang cheng vbc. 73 a hmu a, sawrkar kum kal meka Chhiah a hmuh tlem ber thla a ni a. GST atangin August thla vek hian cheng vbc. 63 hmuh niin kum 2 leh thla 5 chhunga GST atanga Mizoram sawrkarin Chhiah a hmuh tlem ber dawttu leh kumin-a GST atanga Chhiah a hmuh tlem ber thla a ni bawk.

Mizoram sawrkar chuan luidung nungcha man khapna hun (Closed Season) a puang leh ta. Hemi chungchanga sawrkar thuchhuah in a tarlan danin Mizoram luidung-ah Sangha fuan hun a lo thleng leh dawn ta a, luidung nungchate an lo pun zel theihna turin leh Nghafuan hun laia him taka an inthlahpun theihna turin Mizoram Fisheries Act, 2002 Section 5(1) leh (2) behchhanin, Mizoram Sawrkar chuan luidung nungcha man khapna hun (Closed Season) hi a puang a. Hemi hun chhung, October 10 atanga November 30, 2025 chhungin Autonomous District Council Area tel lovin Mizoram hmun dang zawngah Sangha leh luidung nungchate man, tihhlum leh an nunphung tihbuai te khap tlat a ni. He Dan bawhchhia te chu Thla khat (1) chhung Lung in tan, thla thum (3) chhung pawhsei theih emaw, Rs. 5000/-chawitir emaw; a pahnih (2)-in emaw hrem theih an ni ang.

Mizoram sawrkar, Synod Revival leh Central YMA te tanghoin ruihhlo ngaite chhanchhuahna tura an buatsaih, Hulhliap Short Stay Centre Batch 4-na chu nimin khan Synod Camping Centre, Neihbawih-ah neih tan a ni leh ta a, Camper-te thlahna hi Central YMA Hall leh Bawngkawn YMA Hall-ah hman niin Camper 200 vel an lut a ni. Camper-te dawnsawnna leh thlahna inkhawm ah hian MYC Chairman Malsawmzuala Ralte bakah Aizawl SP Rex Zarzoliana Vanchhawng, END-a Joint Commissioner Peter Zohmingthanga leh Central YMA Treasurer Roneihthanga ten fuihna thuchah an sawi a ni. Hulhliap SSC Camping hian ni 20 chhung a awh ang a. Hulhliap SSC Batch hmasa lama chhuak tawh mi engemaw zat chu kutthemthiam zirna (Skill Development Trainning) neihpui tawh an ni a. Sawrkar atanga Certificate dawngin mahni ke-a dinga eizawnnna bul tan pawh an awm nual tawh a ni.

Mizo Zirlai Pawl (MZP), College SU Leaders leh Mizoram University, Students' Council hruaitute chuan nimin khan Aizawl-a MZP Office-ah Joint Meeting neiin Post Matric Scholarship chungchang an ngaihtuah a, kum 2023-2024 leh 2024-2025 Financial Year a Scholarship la dawng lo zawng zawngte harsatna hre reng chunga hmalak ho relin, SNA SPARSH exemption October 31, 2025 (Zirtawpni) ralhma ngeia hma la vat turin an ngen a ni.

Kolasib Bialtu MLA leh Assembly Deputy Speaker Lalfamkima chuan a Bial chhunga zirna In thenkhat a tlawh tuma Zirtirtu ten an mamawh an lo thlen tih hlawhtlinna atan nimin khan a Bial chhunga School thenkhat te hnenah Green Board a hlan a, tun tumah hian Kolasih khawpui chhunga zirna In 7 te hnenah hlan niin a vaiin Green Board 19 semchhuah a ni a. Zirna In ten an mamawh an lo thlen tawh te chu an mamawh dan a zirin a tih hlawhtlin thu a sawi a ni.

Indian Institute of Mass Communication (IIMC), Aizawl-in Hindi tawng puala kar hnih chhung hun an hman, Hindi Pakhwada chu nimin khan khar a ni. He hun hi DDK Director (News) leh IIMC enkawltu Officer on Special Duty Nampibou Marinmai bakah Special Guest pahnih Universal Hindi Communications Centre (UHCC) Director, Dr. VR. Ralte leh Mizoram University Hindi Department atangin Prof. Sanjay Kumar ten an telpui a, Hindi Pakhwada an hman chhunga intihsiakna hrang hrang - Debate, Documentary, Hindi typing, Hindi Essay, Radio Jingle leh Staff te tana thu insawisiak an buatsaih bawk a ni. Hindi Pakhwada hi September ni 15, 2025 atang khan hman a ni a, ni tin zirlai pangngai bakah Hindi Pakhwada pualin hun an hmang tel ziah a ni.

Health Minister Lalrinpuii leh P&E Minister F. Rodingliana te chuan nimin zing khan Civil Hospital, Aizawl tlawhin tunhnaia power lama he damdawi In-in harsatna an tawh te enin a sutkian dan tur an sawiho nghal bawk.

PWD Minister Vanlalhlana chuan October 30, 2025 atangin Aizawl khawpui kawng siam that hna tan a ni dawn tih sawiin, Aizawl leh Lunglei inkar kawng pawh hma an lak zui nghal tur thu a sawi bawk.

Nizan hmasa dar 7:15 vel-a Kawnpui leh Mualkhang Rel Station inkar-a Rel in a suthlum Zonunzira (51) chu nimin khan a ruang Postmortem a ni.

Kumin (2025) chhungin Aizawl District Police Crime Branch-ah thubuai chi hrang hrang 1,286 ziahluh a ni tawh a, heng zingah hian inrawk (burglary) kaihhnawih thubuai a tam ber.

MNF National Core Committee Member Tawnluia chuan Pathian leh mipui zarah an sawrkar leh a nih chuan an sawrkar leh veleh FCAA 2023 sawrkar-in a adopt chu an hnuklet nghal ang tih a sawi.

Sawrkar laipui atanga Aspirational District, Mamit viltu Prabhari Officer Padmini Singla-i chuan nimin khan Mamit tlawhin Mamit khawpui chhunga hmasawnna hmel lanna hrang hrangte a en a, sawrkar Department hotute nen an inkawm nghal bawk.

LESDE UPSC Challenge Inter College Quiz Competition 2025 neih zawh takah Govt. Serchhip chu pahnihna an ni.

Nimin September 28, 2025 kha khawvel pum-a Ui â hri venna ni, 'World Rabies Day' a ni a, Mizoram-ah chuan he ni pual hian Inrinni khan hmun hrang hrangah hun hman a ni.

Rashtriya Poshan Maah 2025 hman mek pualin Inrinni khan Serchhip-ah ‘Plantation Drive (Adopt a Tree)’ Programme hmangin thingtiak phun sa tihfaina hun hman a ni.

Serchhip District Consumer Association (SDCA) chuan ‘Vantlang Viltu’ apps chu Consumers te tan tangkai taka hman theih a nih tawh thu an sawi.

Mizoram District hrang hranga cheng thalaite tan Border Security Force (BSF) General Duty tur mi 300 lakna chu kalpui mek a ni a, Chief Minister Lalduhoma chuan BSF sipai lakna hi Mizo thalai ten beisei angin an bengkhawn tawk lo nia sawiin, Mizo tlangval chu ngaihven turin a sawm a ni.

Mizoram Baptist Kohhran a thalai pawl, Thalai Kristian Pawl (TKP) Serchhip Pastor Bial te chuan Inrinni khan Serchhip District Hospital Blood Bank-a dah turin thisen Unit 14 an pe a, thisen petute hi mipa leh hmeichhia 7 ve ve niin Serchhip Blood Bank-ah kalin thisen hi an pe a ni. Inrinni vek khan Serchhip-a awm Assam Rifles te chuan rampum huapa hmeichhia leh naupang te hriselna leh ei leh in tihchangtlunna tura September thla a hman mek ‘Swasth Nari Sashakt Parivar Abhiyan’ denchhenin Serchhip Blood Bank-ah thisen Unit 8 an pe bawk.

Mamit District Chief Medical Officer (CMO) pisa huamchhung ah hriselna lam a hnathawktu Health Worker indaihlohna a nasa hle a, Mamit District-a Health Sub-Centre 6-ah leh Health Clinic Centre pakhat ah te chuan thawktu Health Worker an awm lo. Thudawn danin Health Sub Centre-ah hian a lo berah thawktu Health Worker mipa leh hmeichhia an awm tur a nih laiin Mamit District chhung khaw 6 - Darlak, Marpara, Parvatui, Saikhawthlir, New Eden leh Silsuri khua leh Health Clinic Centre Rajiv Nagar khuaah te chuan thawktu Health Worker an awmlo a. Mamit District chhungah hian Health Sub-Centre 39 awmin chung zinga 6-ah chuan thawktu an awm lo a, Health Sub-Centre 12-ah te chuan Health Worker mipa awm lovin, Hmeichhe Health Worker awm lohna Sub-Centre 9 a awm bawk a ni.

Sawrkar laipui-a Ministry of Culture hnuaia North East Zone Cultural Centre (NEZCC), Dimapur leh Mizoram sawrkar-a Art & Culture Department tangkawp buatsaihin Inrinni khan Aizawl DIET Auditorium-ah 'One day Painting Workshop on Viksit Bharat' neih a ni a, he hun hi Art & Culture Minister C. Lalsawivunga chuan khuallian nia hmanpuiin Workshop-ah hian 'Cultural & Tradition' tih thupui hmangin lemziak intihsiakna neih a ni a, Professional Category-ah Artist 21 leh Young Artists/College Student Category-ah zirlai 40 telin, School Students Category-ah school naupang 98 an tel bawk.

Mizoram Sawrkarin Mizo damlai zinga upa bera a puan Pi Buangi chu Inrinni (Sept. 27, 2025) zan dar 7:55 khan Aizawl-a Ebenezer Medical Center-ah a boral a, nimin khan vuiliam a ni.

Mizoram sawrkarin Zu leh ruihhlo bawih a tangte chhanchhuahna tura ruahmanna a siam Hulhliap Short Stay Centre thawh lina (4th Batch) chu Vawiin, September ni 29, 2025 atang hian neih tan leh a ni dawn a. He Camping a lut turte chu zing dar 10:00-ah Central YMA Office leh Bawngkawn YMA Hall, Sairang road-ah te in report tur niin heta tang hian Synod Camping Centre, Neihbawi panpui an ni leh dawn a ni.

Mizo Battalion National Cadet Corps (NCC) in ni 10 awh Combined Annual Training Camp (CATC-94) 2nd Battalion Mizoram Armed Police (MAP) Complex, Luangmual, Lunglei-a an buatsaih chu Inrinni khan zawhfel a ni a. CATC-94 hi Sept. 18, 2025 khan tan niin, Mizoram chhim lama Schooll leh College hrang hrang atangin Cadet 200 chuangin chhimin thil chi hrang hrang an zirho a ni.

Mizoram Engineers Service Association (MESA) chuan Zirtawpni khan Aizawl-a P&E Conference Hall-ah Annual Conference vawi 44-na hmangin Chief Minister Lalduhoma chuan a hmanpui a, Engineer-te chu ram hmasawnnna hna thawktu leh mipuite hmaa sawrkar hmel tilang chiang bertute zinga mi an nih angin, sawrkar thawhpui kawngah theihtawp chhuah zel turin a chah a. An hmalakna hrang hrangte fakawm a tih thu sawiin, Sawrkar chuan uluk takin an hnathawh apiang a vil ve reng tih hre turin a chah a, ram ro tlinga hna thawk chhunzawm zel turte, Department hrang hrangte nen tanrualna tha tak nei chunga hna ruahman thin turte in a chah bawk.

Khawvel pum-a mihring tluklehdingawn 1.5 (1.5 billion) vel chu ri hriatna chak lo an ni.

Aizawl City College Joint Students' Union (ACCJSU) chuan sawrkarin tuialhthei man-a Cess a lak a hmanna tur Social Infrastructure and Services hnuaiah College zirna emaw, Higher & Technical Education Department lam telh ngei nise an duh thu an sawi.

Cheng vaibelchhe 26 senga sak Mizoram Engineering College (MEC), Pukpui Lunglei chu thawktu (staff) leh sum hman tur awm loh avangin a nihna tur anga hman tangkai a ni lo niin CAG report chuan a tarlang.

Kumin (2025) chhungin Aizawl District Police Crime Branch-ah thubuai chi hrang hrang 1,286 ziahluh a ni tawh a, heng zingah hian inrawk (burglary) kaihhnawih thubuai a tam ber.

India ram puma September ni 22, 2025 atanga Goods and Services Tax (GST) 2.0 Reform hman tan a nih hnuah bungraw tam takah GST rate tihhniam a ni a. Hemi rual hian bungraw man pawh a tlawm phah a. Mizoram-ah erawh chuan sumdawng thenkhatin GST rate thar anga an bungraw man an la tihhniam loh avangin Taxation Department chuan enfiah hna an thawk mek.

Serchhip SP Gavit Gogna IPS chuan mipuite tana hriattirna tichhuakin August 4, 2025-a thu-chhuah siama “Two Wheeler khalhtuten Helmet (Protective Headgear) him leh rintlak, ISI mark chuang emaw, Bureau of Indian Standards (BSI)-in a pawm chin leh a tlukpui Helmet tha leh him chín chauh khum tur” tia an lo tarlan tawh chu October 1, 2025 (Nilaini) atang hian Serchhip Town chhungah hman tan tur a nih thu a tarlang. Thudawn danin he thupek zawm lo man te chu MV Act 1989 Section 194D angin Rs. 1000/- chawitir leh Driving License thla thum (3) hren sak thlenga hrem theih an ni ang.

Mizo Students’ Union (MSU) General Hqrs. buatsaih ‘LESDE UPSC Challenge Inter College Quiz Competition 2025’ neih mekah Govt. Serchhip College chuan Final an lut ta a, zanin dar 8:00 hian Ignite Studio, Khatla-ah Final Round hi neih leh tur niin live-a pekchhuah leh tur a ni ang. He Intihsiakna ah hian Mizoram Christian College, Govt. Hrangbana College leh Govt. Serchhip College ten Final Round an hma-chhawn dawn a ni. Tarlan tawh angin Govt. Serchhip College aiawhin Lawmsangzuala (5th Semester BA) leh Lalhunmawii (3rd Semester BA) te an tel a ni.han a hna thar a rawn zawm ta.

Serchhip District-a Krishi Vigyan Kendra (KVK) North Vanlaiphai chuan nimin khan Serchhip District chhung Cluster hrang hranga National Mission on Natural Farming (NMNF) hnuaia Community Resource Person (CRP) te tan Natural Farming chungchang training an buatsaih.

United Pentecostal Church-North East India (UPC-NEI) Serchhip Bial Mission Department Inkhawmpui vawi 48-na chu nizan atang khan New Serchhip UPC Biak In-ah neih tan a ni a, naktuk Pathianni zan thleng a awh ang. He Inkhawmpui-ah hian thupui atan ‘Tho la eng rawh’ (Isaia 60:1) chu hman niin Speaker atan Rev. KVL. Hmangaihkima chu hman a ni bawk.

Mizoram sawrkar in tunhnaia District Hospital Serchhip-a Doctor (Medicine) a rawn dah thar Dr. Lalhmangaiha chuan nimin khan a hna thar a rawn zawm ta.

Mizoram Middle School Teachers’ Association (MSTA) Sub-Hqrs. Serchhip chuan nimin khan Annual Conference vawi 26-na an hmang.

Mizoram tlawha lo zin US Consul General, Kathy Hiles Diaz, Kolkata leh a thawhpui ten nizan hmasa khan Chief Minister Lalduhoma hmuin hmasawnna tur hrang hrang an sawidun.

Tourism Department buatsaih ‘World Tourism Day’ lawmna chu nimin khan Tourist Lodge, Chaltlang Conference Hall-ah neih niin Tourism Minister Lalnghinglova Hmar chuan a hmanpui a, World Tourism Day hi September ni 27-ah hman thin niin kumin hian Inrinni-a a tlak avangin September ni 26-ah a lawmna hi neiin thupui atan ‘Tourism and Sustainable Transformation’ tih chu hman a ni. He hunah hian Tourism Minister chuan kum 2024-2025 chhunga khualzin za zela 139.50%-a an pung chu lawmawm a tih thu a sawi bawk. Nimin-a he hun hman ah hian ‘Mizoram Tourism Excellence Awards 2025’ chu sem nghal a ni bawk.

Niminpiah-a Synod Executive Committee thukhawm chuan Synod Hospital leh John William Hospital, Lunglei-ah te Mizoram Universal Health Care Scheme (MUHCS) hman an remti a, MUHCS hotute chuan tun thlengin Mizoram Synod damdawiIn pahnih tiamin Mizoram-a Private damdawi In 15 ten MUHCS an zawm tawh thu leh hei hi za zela 40.62 niin Private Hospital dang nen inbiakna kalpui mek a ni tih an sawi.

Siaha District-a Evangelical Church of Mara-land (ECM) Kohran hrang hrangte chuan Sept. 26, 1907-a Rev. RA. Lorrain-a te nupa in Mara ram-a chanchintha an thlenpui champhaphak pualin nimin khan 'Chanchintha thlen ni' vawi 118-na an hmang a, 'Chanchintha thiltihtheina' chu thupui-ah hmangin Lakher Pioneer Mission (LPM) Missionary-te chanchin te ngaihthlak a ni bawk. Tun dinhmunah ECM hnuaiah hian Local Church 109 awm mekin, Local Church 15 hi Mizo Service a ni a, a dang zawngah Mara Service a ni.

School Education Minister Dr. Vanlalthlana chuan tun thla ni 24 leh 25 khan Mamit District chhung khan Govt. Lallen High School, Govt. Phuldungsei High School, Pukzing RMSA Secondary School, Dapchhuah RMSA Secondary, Dapchhuah Adhoc Middle School leh Govt. Dapchhuah Primary School-te a tlawh a, heng School a tlawhna ah hian Zirtirtute chu an intuai hriam reng a ngai tih sawiin, tunlaia thil thleng leh thiamna chhuak thar zirtir zel thei tura Textbook pawn lama mi zirtir tel thin turin a chah a. MBSE-in Academic Session thar atangin Pawl 9-ah Common Question Exam a buatsaih tur thu sawiin, National Level Exam JEE leh NEET-ah te Mizo zirlaite an tih that zawk theihna tur leh zirtirtute tang zawka siamtu tur a nih thu a sawi a. SCERT chuan Elementary School-ah Common Question (Standardized Assessment for Elementary Schools-SAfES) a buatsaih tur thu a sawi bawk.

Mizoram Volleyball Association (MVA) buatsaih Inter-Village Volleyball Tournament khelh turah Mipa Team 68 leh Hmeichhia Team 14 an tel dawn a, October 1 khian khelh tan tur a ni ang.

Thingdawl ICDS Complex-ah Kolasib Observation Home sak thar chu nimin khan Social Welfare, Women and Child Development Department changtu Commissioner & Secretary Lalzarmawii chuan a hawng.

Central Young Lai Association (CYLA) chuan nimin khan Lawngtlai-a YLA Golden Jubilee Hall-ah thuthar thehdarhtute kâwmin, Mizoram-a Autonomous District Council (ADC)-te thuneihna tih têt leh tihchhiat tumna awm mek an dodal tlat tih sawiin, 'The Forest (Conservation) Amendment Act, 2023' chu ADC-ten an tuar nasat ber tur thu an sawi bawk.

Sawrkar laipui hmalakna hrang hrangte State chhunga kalpui dan ngaihtuahzui a vilzuitu, State Level DISHA Committee (Development Coordination and Monitoring Committee) chu nimin khan Chief Minister Lalduhoma hova thukhawmin sawrkar hmalakna hrang hrang thlirho a ni.

Sports & Youth Services Department changtu Minister Lalnghinglova Hmar hovin a Pisa-ah Ministry of Youth Affairs and Sports hnuaia MyBharat portal leh thalai kaihhnawih portal danga thalai tam zawk ziahluh dan tur chungchang sawihona niminpiah khan neih a ni.

Mizo Students’ Union (MSU) General Hqrs. hruaitute chuan nimin khan Home Minister K. Sapdanga chu a Pisa-ah hmuin Mizoram chhunga Sairang thlenga Rel alo luh tak avanga hnamdang ten min chim nasat dawn avang leh Mizo mipuite kan him tlan zawk nan Inner Line Permit (ILP) Check Point thuamchak a tihchangtlun anih theih nan hma la turin an ngen a. Sairang thlenga Rel lo lut turah hian Sihhmui-ah chauh ni lo, Sihhmui leh Phunchawng inkarah ILP khauh taka check a nih theih nan ILP Check Point siam tura ngenin, ILP Check Point ni lo, aruka lolut te an awm theih venthawn thilah Serkhan-ah pawh ILP Check Point a awm theih nana hmalak pui turin an ngen a. Tourist te hman theih tur bik ‘Tourist ILP’ a hran duan tha an tih thu an sawi bawk.

Health & Family Welfare Department-a Integrated Disease Surveillance Programme (IDSP) chuan Sazu puang chungchangah mipuite chu fimkhur turin an chah.

Nimin khan Serchhip-a NCORD Meeting vawi 18-na leh kumin atana a vawi 7-na chu DC Meeting Hall-ah Bawrhsap Paul L. Khuma hovin neih a ni a. He hunah hian an hmalakna hrang hrang thlirho niin Serchhip SP Gavit Gogna chuan Crystal Meth gram 96 (Rs.28,80,000 hu) man niin a neitua puh mi 5 te chu ND&PS Act hnuaiah Criminal Case siam sak niin Jail-a dahluh an nih thu a sawi a. Police Department chuan Chalkhan, Sailiamkawn leh East Lungdar-ah te uluk takin lirthei veivak an endik thin thu a sawi bawk. Excise & Narcotics Department chuan Heroin gram 129.8 manin, Ganja gram 25 an man bawk a, mi 2 an manin ND&PS Act hnuaiah thubuai an siamsak an nih thu an sawi bawk. Bawrhsap chuan ruihhlo do kawngah theihtawp chhuah zel turin he huna tel te chu a chah bawk a ni.

Swachhata Hi Seva hmalakna kal mek hnuaia ‘Faina Hapta’ leh ‘Faina Hnatlang runpui’ chu nimin khan Mizoram hmun hrang hrangah huaihawt a ni.

Prime Ministers School for Rising India (PM Shri) Jawahar Navodaya Vidyalaya (JNV) Thenzawl chuan nimin khan Vantlang tana luanchhuahna hun hmangin Thenzawl khawchhunga YMA Branch pali leh Thenzawl Zone Football Association (TZFA) hnena Bawlhhlawh bawm tha chi an pe a, he hun hi Thenzawl SDO (Civil) K. Lalhlimpuia chuan hmanpuiin bawlhhlawh bawm hi a hlan a ni.

The Mizoram Bana Kaih (Hand Holding) Scheme hnuaia Serchhip District chhunga vil zuitu Monitoring Committee chu nimin khan Serchhip DC Meeting Hall-ah thukhawmin an hmalakna an thlirho.

Mizoram Larsap, General (Dr) Vijay Kumar Singh chuan nimin khan Social Welfare Department hotute chu Raj Bhavan-ah kawmin an Department kaltlanga upate enkawlna kalpui dan leh pension pek dan chungchang a sawipui a. Mizo khawtlangin Upate ngaihsaka a dah pawimawh thiam thin chu lawmawm a tih thu a sawi.

Saitual-a District Panchayat Resource Centre (DPRC) sak mek chu nimin khan District Bawrhsap leh DPRC Supervision and Monitoring Committee Chairman Dr. Lalngura Tlau hovin enfiah a ni a, DPRC hi RAGY sum hmanga sak niin hnathawktute chu an la thawh zawh loh lai te a rang lama zo turin an hrilh a, thla thar lamah LAD Minister hoa hawn beisei a ni.

Nimin khan Chief Minister Lalduhoma hovin General Administration Department (GAD) hmalakna thlirho niin GAD (Aviation) hnuaiah AAI atangin Lengpui Airport an enkawl theih dan tur an rawtna nghah mek a nih thu tarlan a ni a, Lengpui Airport Runway thuamthat nan tunhnaiah sawrkarin cheng vbc. 86.8 a pek thu leh Hna a thawh theih veleh (working season) chak taka thawk turin mamawh lamkhawm mek a nih thu tarlan a ni a. Airport ram hungna tur cheng nuai 162.06, Terminal-a Air Condition bunna tur cheng nuai 544.06 leh Conveyor Belt pahnih bunna tur cheng nuai 375.84 te pek tawh an nih thu tarlan a ni. Heng bakah hian Mizoram Helicopter Service mek atangin kum khatah cheng vbc. 33 . vel hmuh thin niin State sawrkarin kum khatah cheng vbc. 2.5 vel a seng ve thin tih tarlan a ni a, RCS UDAN hnuaiah October thla atang hian Pawan Hans Helicopter a service belh leh dawn a, a service-na tur zingah Aizawl - Silchar leh Aizawl - Churachanpur pawh telin, Thenzawl-ah cheng vbc. 12 . sengin Heliport sak...

Zoram Thar Zofate Lairelna Inpui chuan Mizo-ram State Assembly Session-ah Hnam anga an nihna chu Zofate a nih thu sawiho tura chhawpchhuak tura ngenna nimin khan Assembly Speaker Lal-biakzama hnenah an thehlut tih an President Rev. Dr Zaichhawna Hlawndo chuan thuthar thehdarhtute kawmin an sawi a. Ngenna an thehluh ah hian hnam an nihna (national identity) chu Zofate a nih thu Session a sawiho tura chhawpchhuak tura an ngen bakah, Hnam tobul an chhuichhuah atangin Zofate thlahtu Zo, Zova, Yo leh Jo-a ni ti a pi leh puten an lo sawi thin chu Bible-a Jakoba (Israela) fapa Zosefa kha a ni tih an hmuchhuah thu a sawi bawk.

Lunglei Serkawn-a Baptist English School (BES) chu an zirlaite zingah tunlai tlang hrileng a hluar avangin nimin khan khar a ni a, Civil Hospital Lunglei chuan vawiin khan New Building-ah BES naupang bik enkawlna tur ruahman sakin Thisen Sample an lak te ZMC lamah endik tura thawn tura ruahman a ni.

Retailer atanga buhfai la tur, Kut zungpui thla hmu thei lo te tana hman tur Mit naute enna (Iris Scanner) chu nimin khan Lawngtlai District-a Retailer te hnenah semchhuah a ni.

Nimin khan Saitual-ah District Level Steering Committee (DLSC) for Lakhpati Didi chu an thukhawm a, thutkhawm kaihruaitu Bawrhsap Dr. Lalngura Tlau chuan Lakhpati Didi chu hmeichhe chawikan nana Sawrkar hmalakna pawimawh tak, hmeichhiate chu kum khata cheng nuai khat (1) an lakluh ve theih nana kawng kawhhmuhna a nih thu a sawi. Lakhpati Didi hi India sawrkar hmalakna niin, August ni 15, 2023 khan kalpui tan a ni a, a tum ber chu hmeichhiate chawikan niin kum 1-a cheng nuai khat lalut thei tura tanpui a ni a. Lakhpati Didi tih chu kum khata nuai khat lalut tling hmeichhia sawina a ni. He hmalakna hi DAY-NRLM hnuaia kalpui niin, Self-Help Group (SHG)-a hmeichhia te chu eizawnna an neih theih nan kawng hrang hrang- thlai chin, ranvulh, puanthui leh kutthemthiamna lam kawhhmuh te a ni a. Saitual District-ah hian kum 3 chhung hian Lakhpati Didi target chu mi 1600 an ni.

Health Minister Lalrinpuii chuan Mizoram-a PHC leh CHC zawng zawng bakah District Hospital tinahte Pharmacist dah vek tura hmalak a nih thu a sawi.

Nimin khan Chief Minister Lalduhoma hovin a Department enkawl pahnih General Administration Department leh Law & Judicial hmalakna thlirletna hun hman a ni.

Mizo Territorial Army din tura hmalakna kal mek chu nimin khan Lt. Col. Clement Lalhming-thanga MLA hovin sawiho a ni.

Vantawng Group YMA-a Vigilance and Monitoring Sub-Committee te chuan niminpiah khan Thenzawl-a AYUSH Hospital panna kawng a Culvert leh Retaingwall siam hna thawh mek chu a hmunah tlawhin an enfiah a. Hei bakah hian DRDO hnuaia Vety Dilpui panna kawng PCC a siam/chhun hna thawh zawh tawh chu en bawkin heng hnathawh an en te hi a tha thawkhat nia an hriat thu an sawi a. Vantawng Group YMA huamchhunga hmasawnna hna thawktu te chu an hna te a tha thei ang bera thawk zel tura an ngen thu an sawi bawk a ni.

Mizoram State Sports Council (MSSC) chuan Lunglei-a Mizoram State Sports Council (MSSC) Golden Jubilee 44th Mizoram State Boxing Championship khelh mek chu titawp nghal turin nimin khan a hriattir.

Mizo Students’ Union (MSU) General Hqrs. Aizawl buatsaih LESDE UPSC Challenge Inter College Quiz Competition neih mekah nizan hmasa khan Second Round inelna neih a ni a, Serchhip atanga tel Govt. Serchhip College te chuan Semi Final an lut a, Govt. Serchhip College atang hian Lawmsangzuala (5th Semester BA) leh Lalhun-mawii (3rd Semester BA) te an tel a ni. He Quiz Competition-ah hian Govt. Serchhip College bakah Pachhunga University College, Govt. T Romana College, Govt. Johnson College, Govt. Hrangbana College leh Mizoram Christian College te chuan Semi Final hi lutin Semi Final inelna hi zanin hian neih a ni dawn a, Semi Final-a lut zawng zawngte inlanin Final lut turte pawh hriat theih an ni ang.

Mizoram State Policy Coordination Committee chuan Bana Kaih Scheme Phase-II hnuaia Chief Minister’s Special Package dil dan tur chungchang ah thuchhuah siamin Chief Minister Special Package Grant hi Online leh Offline-a dil theih a nih thu a tarlang a, tanpuina dil theih zat hi Rs. 50,000/- (Cheng sing nga) thleng niin Online-a diltute chuan a link, handholding.mizoram.gov.in atangin thehluh tur a ni a, Passport size photo, Voter ID Card/EPIC, Aadhaar Card Bank Pass book phek hma (account hawn ni lanna) leh Ration card thlalak fiah tha tak upload tel tur a ni tih a tarlang a. Offline-a dil turte chuan a form fill-up sa emawin mahni awmna District-a Deputy Commissioner (DC) Office emaw, Sub-Divisional Officer (SDO Civil) Office emaw, Block Development Officer (BDO) Office leh Common Service Centre (CSC)-ah te document tarlante hi ken tur a ni ang.

Mission for Integrated Development of Horticulture (MIDH) Special Intervention 2025-2026 hnuaiah Champhai District-a Grape kung upa tawh tuaithar lehna tura hmalakna chu nimin khan Champhai Tlangsam-a Winery-ah a bultanna neih a ni a, MIDH Special Intervention 2025-2026 hmang hian Grape upa tawh tuaithar lehna turin Horticulture Department chuan Grape chingtute hnenah leitha (Neem Cake) kg 75, leichi (NPK 20:20:20) kg 30, Staking Cord (tui pipe) roll khat, rannung thahna (Imida-cloprid) 200 ml, a natna enkawlna damdawi (Blue Bordo) Kg 4, a kahna (Battery Operated Sprayer) leh a tang tanna (Secateur) chu Grape chingtu mi 360 hnenah Unit khat theuh a thlawnin pek an ni dawn a, heng an thil pek turte hi Rs. 14,770 hu niin Champhai-ah hian Grape chingtu mi 277 awmin Hnahlanah mi 83 an awm a, he hun hi Horticulture Secretary Maria CT Zuali chuan a hmanpui a ni.

Ministry of DoNER hnuaia din, High Level Task Force on Handloom & Handicraft chu nimin khan an Chairman, Nagaland Chief Minister Neiphiu Rio kaihhruaiin Online hmanga neih a ni a, he hunah hian Mizoram Chief Minister Lalduhoma pawhin Member a nih angin a Office atangin a lo zawm a ni. He hunah hian Chief Minister Lalduhoma chuan thutkhawm hmasaa an sawite bawhzuiin Mizoram-ah Handloom & Handicraft kalpui theihna hmunte an thlang fel tawh tih a sawi a. Hmarchhak Bial huapa hmasawnna tur rawtna pali- Cluster base-a hmarchhak huapa kal thu te, E-commerce tangkai zawka hman te, rampawn a thawhchhuah lama hmalatu tur din leh Handloom & Handicraft lama Inter-State leh Centre thawhhona Council chak tak din te chu rawtna siam niin heng rawtna te hi an sawiho nghal zel a, hmalak dan tur pawh an duang bawk a ni.

Aizawl District chhunga Bank hrang hrang te hmalak dan thlirin nimin khan Bawrhsap hova thutkhawm neih a ni a, he huna tarlan a nih danin Aizawl District-ah hian Bank 26 awmin CD Ratio 20% aia hniam Bank 6 an awm a, 20% leh 30% inkar nei Bank 4 awmin30% to 40% inkar nei Bank an awm lova, 40% aia tam CD Ratio nei Bank 16 an awm bawk a ni.

Nimin khan Khawbung PHC-ah Swasth Nari Sashakt Parivaar Abhiyaan denchhenin Health Kiosks-TB Screening leh AYUSH Health Camp neih a ni a, mi 45 te chu TB an kai leh kai lo enfiah niin an zinga mi 9 te chu Sample enfiah nawn tura tih an ni a. AYUSH Health Camp-ah hian damlo inentir mi 105 awmin a mamawhte hnenah a thlawnin damdawi pek nghal an ni bawk.

Nimin khan Kolasib-ah District Legal Services Authority leh District Programme Officer, Women & Child Development tangkawp buat-saihin Prohibition of Child Marriage Act, 2006 chungchang zirhona neih niin kum tlinglo a inneih a pawi zia hrang hrang inzirtir a ni.

Aizawl West-I Bialtu MLA TBC. Lalven-chhunga chuan a Bial chhunga Rangvamual-a chhungkaw thlanchhuah paruk (6) te hnenah Ar note 100 theuh leh Ar chaw bag hnih (2) theuh a pe a, tuna Ar note an sem chu Pilot Project a nih thu leh a hlawhtlin dan azirin Phunchawng leh Veng thenkhatah hmalak chhunzawm zel tur a ni tih a sawi a. Krismas boruak vuakvet thlir chunga he project hi kalpui a nih thu pawh sawiin, thla thum (3) chhungin Ar hi hralh a tlin ngei an beisei thu leh a Market lamah pawh harsatna a awm loh an beisei thu a sawi bawk.

PHE Minister Prof. Lalnilawma chuan Ministry of Jal Shakti changtu Union Minister CR. Paatil chu niminpiah khan New Delhi-ah kawmin Jal Jeevan Mission (JJM) hnuaiah Mizorama khua zawng zawng deuhthaw cover anih avangin lawmthu a sawi a. Chutih rualin JJM hnuaia hnathawh zawh tawh bill tang rei lutuk chungchang sawiin, release sak thuai turin a ngen a. Minister chuan JJM chungchangah Ministry Level-ah chinfel ngai a awm thu leh theihtawp chhuahin an bawhzui thu sawiin, a fel veleh pawisa an pek tur thu a lo hrilh a ni. PHE Minister chuan Mizoram chu tlangram, ruahtui tamna a nih avangin a remchanna apiangah ruahtui khawlna siam a, tuihna siam thei tur kawr leh tlang kar khuahna siam a pawimawh em em tih sawiin, chutianga hmalakna tur project PHE Department-in a thehluh tawh pawh pe ngei turin a ngen nghal bawk a. Union Minister hian DPR thehluh tawh chu lo zirchianga a tih theih dan tur ngaihtuah turin Official-te a hrilh tawh thu leh a lo bawgzuipui zel tur thu a sawi bawk a ni.

Sawrkai laipuiin September 22, 2025 atanga GST Dan thar a hman hnuah he Dan hnuaia bungraw hralhna man tur a bithliah zawm lo an awm avanga Taxation Department chuan complaint 15 dawng tawhin GST rate thar anga thilman hniam tura ngaih, hniam si lote chu hriattir zel turin an chah bawk.

Home Minister K. Sapdanga leh Excise Minister Lalnghinglova Hmar te chuan nimin zing khan Vaivakawn Police Station tlawhin Police te fuihtharna leh hmasawnna tura hmachhawp thenkhat te an sawi.

Mizoram sawrkar-a Transport Department chuan Aizawl leh Sairang Rel Station inkarah State Transport Bus tlan tir a tum.

Chief Minister Lalduhoma chuan Mizoram State Project Monitoring Committee (MSPMC) te hnathawh tawh chin chu a tha tawk hle niin a sawi.

MNF Thalaite chuan July ni 7-a Ministry of Tribal Affairs-in Mizoram sawrkar hnena Tribal Scholarship cheng vbc. 50 chuang a pek tawh laia tun thlenga zirlaite hnen a la thlen loh chungchangah ZPM kaihhruai Sawrkar chu mawhphurhna la turin an phut.

UD&PA Department changtu Minister K. Sapdanga chuan Aizawl Smart City Ltd. chu pawhsei zel tlak ni tura tan la lehzual turin thawktute a fuih.

Aizawl Municipal Corporation (AMC) Inthlanpui neih tur atana inbuatsaihna kal mekah Electoral Roll ennawn hna chu thawh tan niin nimin khan Draft Electoral Roll chu tarchhuah a ni.

Aizawl khawpui a lo nawm zawk theih nan leh Traffic jam nasa thinte a lo ziaawm zawk theih nana hmalak dan tura ruahmanna sawihona leh inhrilhhriatna hun chu nimin khan neih a ni.

Kumin August 4 atanga New Serchhip North leh South VC huamchhunga bawlhhlawh tawih thei leh tawih thei lo thliarhranga lakkhawm hna thawh chu mipui ten an zawm thain chhunzawm zel tlak ah ngaih a ni a. He hmalakna Pilot Project-a kalpui hun chhung pawh nakum (2026) January thlaa ennawn tura pawhsei a ni bawk.

Serchhip District chhunga Bank te hnathawh dan thlirletin nimin khan District Level Committee thutkhawm neih a ni.

Rashtriya Poshan Maah vawi 8-na hman mek ah nimin khan Serchhip-ah ‘2000 Steps a day challenge Rally’ neih a ni.

Border Security Force (BSF) Constable (GD) lakna chu nimin, Sept. 23, 2025 khan Serchhip Sports Complex-ah neih tan a ni a, thalai mi thahnem tak in Physical Test an hmachhawn a, ruahman lawk ang chuan Oct. 9 thleng khian chhunzawm a ni ang. Sub-Hqrs. YMA Serchhip ten Sipai intlar tura lo kal, thlenna nei remchang nei lo an buaipui ah nimin thleng khan mi 16 te thlen In pek an ni tawh a ni.

Kum 2000-a din ‘National Integrated Forum of Artist & Activist’ (NIFAA) chuan NGO an nih anga ram leh mipui rawng an bawl kum 25-na, Silver Jubillee lawmna chu Delhi leh Karnal, Haryana-ah hmangin India rama thalai, midang tana thawktu State hrang hrang leh District tin atanga thlanchhuahte hnenah chawimawina an hlan a. Mizoram atangin mi 18 te hnenah chawi-mawina hi hlan niin State Award dawng zingah Baby Laltlanhlui, North Vanlaiphai telin Young Community Champion Award dawng zingah Vanlalhruaitluangi, Chhiahtlang chu a tel bawk.

Serchhip Taxi Owners’ Association (STOA) chuan an pawl dinchampha vawi 38-na pualin nimin Sept. 23, 2025 khan Serchhip-ah mipuite tan a thlawna service hun an hmang a, zing dar 9:00 atanga chhun dar 12:00 thlengin Sailiamkawn leh New Serchhip Kikawn inkar ah Taxi hmang duh mipuite tan a thlawnin an tlan a ni. Hei bakah hian STOA hian an dinchampha pual hian Serchip Bazar-a Taxi Stand-ah mipui a duh apiang tan Theitui in tur an chhawp bawk a ni. Serchhip a Taxi neitute intelkhawmna pawl ah hian Member mi 20 vel an awm mek a ni.

Serchhip District pum tana koh theih turin Friends of People chuan East Lungdar khua ah Hrangturzo Bialtu MLA, Lalmuanpuia Punte hmalakna in Medical Team an dah.

Nimin September 23, 2025 kha Lawngtlai District chhunga tlawmngai pawl lian ber, Young Lai Association (YLA) Day vawi 51-na niin he ni hi YLA Branch hrang hrang ten an remchan angin Vantlang tana thil tha tihna ni atan an hmang a, Central YLA President F. Lalrothanga chuan YLA Member te chibai bukin, YLA chu mangang leh chhumchhia, rethei leh chanhai ten an belh ngam a nih thu a sawi a ni. YLA-ah hian Sub-Hqrs. 10 leh Branch 121 awm mekin Member sing thum vel an awm bawk a ni.

Khawzawl District chhunga kumin January atanga July thla tawp thlenga ruihhlo chi hrang hrang an man te chu nimin khan Bawrhsap K. Vanlal-thiana hovin KVK Khawzawl-ah halral a ni a, kumin January thla atanga July thla tawp thleng khan an District-ah hian Heroin gram 84 manin Rs. 2,52,000 man a ni a, Methamphetamine kg 4.842 (Mum 40,400) manin Rs. 61,64,600 man a nih bakah Ganja gram: 4,011 manin Rs. 20,055 man a ni bawk a, heng ruihhlo halral zawng zawng hlut zawng hi Rs. 64,36,655 a ni a. Heng ruihhlo kaihhnawih ah hian thubuai 6 ziahluh niin mi 7 man an ni bawk.

Hulhliap-Short Stay Centre Core Committee chu niminpiah tlai khan an Chairman leh MYC Chairman Malsâwmzuala Ralte hovin SAD Conference Hall-ah an thukhawm a, he hunah hian an hmalak tawhna leh hmalak zel dan tur thlirho niin Hulhliap-Short Stay Centre-ah hian Batch 3 lut tawhin, Camping pawh vawi 3 neih a ni tawh a. Batch 3 chhungah hian Ruihhlo ngai mi 1,012 lut tawhin, chuta tanga chhuakte chu Skill Training - Assistant Electrician, Aluminium Fabrication leh Food Processing Course-ah te pek zui an ni a, hlawhtling takin mi 56 laiin an zirchhuak tawh a ni. Hulhliap-Short Stay Centre Batch 4-na chu September ni 29-ah tan leh tum niin hemi atana thil tul hrang hrang ngaihtuah a ni bawk.

PHE Minister Prof. Lalnilawma chuan niminpiah khan Housing and Urban Affairs changtu Union Minister Manohar Lal Khattar chu a chenna In-ah kawmin Mizoram khawpui hrang hranga Tui in tur hnianghnar zawk a awm theihna tur project a sawipui a. Union Minister chuan tui supply intodelhna project-te tihpuitlin a nih thuai theih nan sawihona la neih leh nise tiin kawng dap chhunzawma hmalak a inhuam thu a hrilh bawk.

Nimin khan Hnahthial-ah Land Committee chu thukhawmin House Pass leh Periodic Patta dilna lut hrang hrangte an sawiho.

Health Minister Lalrinpuii chuan Alzheimer natna vei te enkawlna kawngah chhungkua, thenawm khaw veng leh khawtlang hriatthiamna leh intawiawm tawnna a pawimawh thu a sawi.

Chief Minister Lalduhoma chuan Mizoram-a National Highway thawmthat ngai te rang taka thawmthat thuai a duh thu NHIDCL hotute a hrilh.

BJP MLA leh Palak Bialtu K. Hrahmo chuan sawrkar laipuiin GST a siamthat avanga thilman tlawm tawh tur leh Railway Service avanga bungraw phurh man a let-a a tlakhniam dawn avangin Mizoram in ‘Malsawmna Thuah hnih’ a dawng niin a sawi.

National Ayurveda Day 2025 lawmna chu nimin Sept. 23, 2025 khan Health Minister Lalrinpuii hovin Aizawl Vanapa Hall-ah neih a ni.

Mizoram sawrkar Flagship Programme Handholding policy (Bana Kaih) Scheme chu a thawh hnihna kalpui tur atan dilna hun hawn tan a ni leh ta.

Serchhip District-a raltlan awm te Biometric Data lakkhawm hna chu tluang taka neih zel niin nimin thleng khan mi 785 chhinchhiah an ni tawh.

Mizoram sawrkar chuan Aizawl Luangmual Vengthlang Chhangurkawn-a cheng Dr. Lalhmangaiha (Medicine) chu Senior Grade of MHS (Specialist Sub-Cadre) atan la tharin District Hospital, Serchhip-a thawk turin a dah nghal a, ni 15 chhunga a hna hi zawm tura tih a ni bawk. Tarlan tawh angin District Hospital, Serchhip-ah hian Dr. K. Lallawmzuala a chhuah hnuah hun engemaw chen Medicine Specialist hi an awm tawh lo a, kawng hrang hranga hmalak a nih hnuah kar kaltaa Serchhip-a rawn kal Bialtu MLA leh Chief Minister Lalduhoma hnenah ZPM Block, Serchhip te chuan lo thlenin hmalak nghal a ni a, tun thla chhunga dah tura tih a nih hnuah he Order hi a chhuak zui ta a ni.

Serchhip District Badmintion Association (SIDBA) chuan nimin khan Serchhip Indoor Stadium-a SDSC Meeting Room-ah State Qualified Umpire Grade-II leh Umpire Exam turte tan  One Day Workshop a buatsaih a, Badminton-a dan hrang hrang zirin a taka enchhinna neih a ni.

Thla thar October 6 atang khian Mizoram sawrkar hnuaia hnathawk te Pisa kai hun tih dang-lam a ni leh dawn a, Sawrkar Pisa kai hun hi zing dar 9:00 atanga tlai dar 4:00 thleng ni tura ruahman niin ramchhung hmun hrang hranga Mizoram House te Pisa kai hun tur pawh ruahman thar a ni bawk. Sawrkar Pisa kai hun hi nakum February thla thleng hman tur a ni ang.

Chief Minister Lalduhoma chuan Central sawrkar chu kan ngai sual lutuk a, min chimral a, kan ram leilung te min chhuhsak turah kan ngai nia sawiin, “Kan ram tana tha lo tur leh him lo tur hi chu ZPM party leh Sawrkarna fawng chelhtute hian kan ti hauh lovang tih ring ngam ang u,” a ti.

Taxation Department-a Commissioner of State Tax, HK. Lalhawngliana chuan Goods and Service Tax rate thar sawrkar laipuiin a siam angin Mizoram-ah pawh sumdawng zawng zawng ten GST rate thar hi nimin atang khan an zawm nghal vek tur a ni tih a sawi.

Lawngtlai District Disaster Management Authority (DDMA) nimin-a thukhawm chuan kumin May 30 zan-a Lawngtlai Bazar Veng leh Chanmari Veng-a leimin avanga chhiatna tawkte hnenah State sawrkar atangin tanpuina sum (Relief) SDRF kaltlanga pek ni tawh mah se, an thil hloh te neih let leh nan a beitham hle tih pawm tlangin, Sawrkar laipuiah 'Special Assistance' dil sak nise an ti.

Hnahthial District chhunga awm Muallianpui khua chuan Zirtawpni khan ‘Lo Zawh Lawm 2025’ hun an hmang a, Muallianpui VCP HC. Lallawm-zuala chuan an khua ah chhungkaw 200 vel awmin mihring 1700 vel an khawsa mek tih sawiin, kumin-ah Lo nei chhungkaw 101 awmin Buh Tin 207 tuhin Kawt 3347 thar tura an inbeisei thu a sawi a. Kumin vek hian chhungkaw 105 ten Sawh-thing chingin chhungkaw 95 in Hmarcha an chin bakah Vaimim leh Chhawhchhi ching chhungkaw 20 chuang ve ve an awm thu sawiin, an khaw-tlang-ah Vawk pul hri a len avanga Vaimim eitu tur Vawk a thih avangin Agriculture Department chuan an Vaimim tharte an leisak dawn tih a sawi bawk.

Home Minister K. Sapdanga chuan tunhnaia Mizo zinga Indian Police Service (IPS) tling thar mi panga te chu nimin khan a Pisa-ah kawmin Mizoram Police kal zelna tura thu pawimawh hrang hrang te an sawi a. Tunhnaia IPS kai thar mi 5- Zosangliana, J. Lalthafamkima, Lalthiam-sanga Sailo, K. Lalremsanga leh Lalringdika te chu 2015 AGMUT Cadre pek an ni chu a lawmpui thu a sawi a, Mizoram Police hmasawnna tura an theihna zawng zawng hlan turin a chah bawk. He hunah hian IPS tling thar te pawhin IPS mawhphurhna an hmuh atangin rilru thar an put lehzual thu leh Mizoram Police hmasawnna tur leh tun aia tha zawka a kal zel theihna tura an theihna zawng zawng hlan an inhuam thu an sawi bawk.

Zokhawthar Police leh Assam Rifle tangkawp chuan niminpiah khan Zokhawthar-ah silai-M4A1 Carbine leh silai mu engemaw zat leh a neitu ni a hriat Robert Vanlalliana, Zokhawthar nia inchhal te chu an man. Thudawn danin Assam Rifles leh Zokhawthar Police tangkawp chuan niminpiah zing khan an thudawn bawhzuiin an rinhlelh chenna In an hual hnuah, Search Team-ten In hi an dap a. Inchhung-ah hian 5.56 mm M4A1 Carbine pakhat, a Magazine leh silaimu engemaw zat an man a, hemi kaihhnawiha an man Robert Vanlalliana hi mi In luaha khawsa mek niin, CNDF mi leh sa lo ni thin ni a hriat a ni bawk.

BJP Mizoram State chuan nimin khan Aizawl-a an party Office-ah Chhung Inkhawm neiin he hunah hian an President Dr. K. Beichhua chuan Dampa Bial-a Assembly by-election neih turah Lalhmingthanga chu an Candidate a ni dawn tih a puang a, Dampa Bial inthlanah BJP thlantlin a nih chuan Dampa leh Delhi inzawm tir an tum tih sawiin, Siaha Bial chu Delhi nena inzawm mek niin a sawi a, “Politics chik mite chuan Siaha mipuiten an tih fuh zia an sawi thin,” a ti bawk.

MNF Party in nimin-a Mizo Hnam Run Chhung Inkhawm an neih ah MNF Treasurer Lalruatkima chuan FCAA, 2023 hmangin ZPM sawrkar chuan kan ram an hralh nia sawiin, “ZPM sawrkar a din tirh phat atangin an kutchhuak ni miah lo Lengpui Airport, ZMC Falkawn leh Serlui B Hydel project te hralh tumin an rel nghal a nih kha. Vai mihausa Inneih a hmanpui denchhenin an zuar kual an zuar kual a, mahse tun thleng chuan hralhna an la hre ta chuang lo a ni,” a ti a. Mizoram hian hmasawnna Development kan tih, Infrastructure ropui tak tak hi kan awtin kan duh ngei tih pawh sawiin, “Kan ram, kan hnam leh kan Sakhua a him dawn em tih ngun taka ngaihtuah chungin, a that dawn loh emaw, a him dawn lo a kan hriat chuan hmanhmawh mai lo tura kan ngaihtuahna kan hman a tul takzet a ni,” a ti a. “Mizo Nationalism hi kan innghahna Lungphum a nih chhung chu kan him dawn a. ZPM sorkarah hian kan ram hi a thlaphang a, a rum mek,” a ti bawk.

Mizoram sawrkar chuan Aizawl Ainawn Veng-a sawrkar Quarters a chengte chu huntiam ralhma ngeia Quarters chhuahsan theuh turin a hriattir.

Sawrkar laipui-a Ministry of Home Affairs sum cheng nuai 116 vel senga thawmthat leh tih-changtlun, Tlabung-a Helipad-ah hun rei tak chhung Helicopter a tum tawh lo.

Disaster Management & Rehabilitation Department changtu Minister Prof. Lalnilawma chuan khuarel chhiatna thleng tam ber chu keimahni fimkhur loh avanga kan thlentir (Man-made) a nih thu a sawi.