Kan ram tana tha lo tur leh hlauhawm tur chu kan ti hauh lovang - Chief Minister

Chief Minister Lalduhoma chuan Central sawrkar chu kan ngai sual lutuk a, min chimral a, kan ram leilung te min chhuhsak turah kan ngai nia sawiin, “Kan ram tana tha lo tur leh him lo tur hi chu ZPM party leh Sawrkarna fawng chelhtute hian kan ti hauh lovang tih ring ngam ang u,” a ti.

ZPM Party in nimin-a Aizawl-a an party Office-a Chhung Inkhawm an neih ah Chief Minister Lalduhoma chuan ‘Forest (Conservation) Amendment Act, 202’ leh a kaihhnawih chungchang sawiin, “India ramah hian 1927-ah Indian Forest Act kan nei a, Bristish ho min siamsak a ni. British ho chu India ramah sumdawng turin an lo lut a, an duh ber chu India thau sawk a ni. India mipui tan leh Tribal-te tan he Forest Act hi a tha vak lo a ni,” a ti a. India-a zalen hnuah keimahni kutchhuak ngei Dan, Conservation of Forest Act chu siam a nih thu sawiin, “Dan tha zawk India sawrkarin a rawn siam chu Mizoram-ah pawh UT kan nih atangin chhum lo chat lovin kan lo hmang char char tawh a ni. He Dan hi TN Godavarman chuan 1996-ah Supreme Court-ah a khing ta a, Supreme Court thutluknaah chuan Community Forest te, Private ram te, Sawrkar ram te, Revenue ram te pawh a vaiin he case hnuaiah chuan Forest tih a lo ni ta a ni,” a ti a. Lal lai ata tawh khawtin in Village Safety Reserve-te kan nei thin thu te, YMA-te pawhin ram humhalh te kan neih thin thu leh khawi khua emawin an khaw himna reserve area-ah an khaw zauhna tur emaw hmasawnna thil dah turte lo awm ta se Godavarman case-ah chuan clearance lak a ngai zel niin a sawi a, harsatna an tawh te pawh a sawi bawk.

Chief Minister chuan kum 2023-ah Forest Conservation of Amendment Act 2023 chu siam a nih thu sawiin, “MNF sawrkar lai a ni a, Guideline leh Rules te kan la hmu bawk si lova, a Dan ringawt han thlir khan kan inhlauh siak ta a, a pawi ang tiin zirchianna a la awm lo nen Resolution te passed-in kan do a nih kha. Amaherawh chu Guideline-te a rawn chhuak a, kan han zirchiang a, he Dan hi kan mamawh zawk niin kan hria a, House-ah lungrual takin kan passed a nih kha. Assembly Speaker-in ‘Remti lo in awm em?’ a tih khan tumahin ‘remti lo’ ti an awm loh avangin dawhkan beng chungin kan passed ta a ni,” a ti.

Chief Minister chuan he Dan kan hlauh chhan ber chu ‘International border atanga KM 100 huamchhunga Forest Clearance lak harsa lutuk hi a awm tawh tur a ni lo’ tih a nih thu pawh sawiin, “KM 100 bial-ah hian a vaiin exemption an pe ngawt lova, Linear Project an tih heng Kawngpui te, Rel kawng te, Gas & Oil Pipeline te, Power Transmission line leh Strategic Security and Public Utility, vantlangin an mamawh thil te a ni. Henga h hian hma an la a nih pawhin an hnathawhna chin bak kha ram pek an ngai lova, khing hmalakna te khi en i la mipuiten nitin-a kan chhawr leh kan mamawh ngawih ngawih an ni,” a ti a. “Indo a thleng lo a nih chuan he Danin a phalsak china hmasawnna hnathawh te hi a chhawrtu tak tak tur chu mipuite kan ni a, Indo a lo thleng palh ta a nih pawhin emergency an puang anga, an duh duhin an ti danglam dawn tho a ni,” a ti bawk.

Kan hnam-in himna chi 5 kan neih thu pawh Chief Minister chuan sawiin, “Bengal Eastern Frontier Regulation hi British ho siam kha a ni a, Mizoram state kan nih khan Mizoram State Act, Section 43-na ah khan he Dan hi hman chhunzawm zel turin a chuang a ni. Paragraph 7-naah chuan, ‘A ram neitu ni lo chuan engmah an nei thiang lovang’ tih a awm a ni. State sawrkar in phalna kan pek loh chuan BEFR 1873 hian min hum tlat a, hemi hnuaiah hian Inner line Permit pawh kan la issue reng a ni. India constitution-a 7 Schedule State list entry 18 leh 23-na ah hian leilung hausakna chungchanga kan himna min pe a ni. Article 371 G-ah pawh kan himna a awm bawk,” tiin hlauh kan inzir-tir nasa lutuk chu a pawi thu leh hlauh tur dik tak Pathian chu hlauh ber tur a nih thu a sawi bawk.