MNF an sawrkar chuan sawrkar-in FCAA 2023 adopt-na an hnuklet nghal dawn tih sawi

MNF National Core Committee Member Tawnluia chuan Pathian leh mipui zarah an sawrkar leh a nih chuan an sawrkar leh veleh FCAA 2023 sawrkar-in a adopt chu an hnuklet nghal ang tih a sawi.

MNF party in nimin-a Aizawl Mizo Hnam Run-a Chhung Inkhawm an neih ah Deputy Chief Minister hlui leh MNF NCC Member Tawnluia chuan FCAA chu Mizoram tan a tha lo a, an pawm thei lo tih sawiin, “He Dan hi MNF sawrkar khan Assembly-ah Resolution pass-in Mizorama hman a remti lo a, a hnawl tawh a. Lok Sabha Secretary General hnenah pawh August ni 28, 2023 khan hriattir nghal a ni a. Chuvangin, he dan hi Mizoram-ah hman a ni lo,” a ti a. “ZPM sawrkar-in ram an hralh a, sawrkar laipuiin an duhdan ang anga Mizoram hmang thei turin phalna (blanket permission) a pe hi rem kan ti thei lo,” a ti bawk.

CSS hnuaia thawktute chungchang pawh sawiin Tawnluia chuan, “CSS employee-te dah ngheh tur chungchangah Chief Minister-in sawrkar hmasa ruahmanna a khirh tiin a sawi a, harsatna awm chhanah a puh a. CSS dah ngheh hi MNF sawrkar khan a ngai pawimawh hle a. Study Team insiamin Department 16-a CSS-te chungchang zirchian a ni a. January 2023 khan Study Group-te report pawh Cabinet-in a lo pawm tawh nghe nghe a. Drafting Committee siam a ni a, CSS Regularisation Scheme an siam ta a, Cabinet-a put luh a nih hmain inthlan puan a ni ta a ni,” a ti a. ZPM an lo sawrkar khan a ngai ngaiin an rawn pawm thu leh a kum chiah an thlak thu sawiin, “Tuna CSS-te an nawrhna chhan tak hi ZPM sawrkar thiltih liau liau a ni. October ni 21, 2024 khan Office Memorandum an siam thar a, he Memorandum hi CSS employee-te nawrh chhan tak a ni. MNF sawrkar thiltih pakhat mah a awm lo a, ZPM sawrkar thiltih liau liau a ni,” a ti bawk.