Chief Minister in MSPMC te hnathawh tawh chin chu a tha tawk hle niin a sawi

Chief Minister Lalduhoma chuan Mizoram State Project Monitoring Committee (MSPMC) te hnathawh tawh chin chu a tha tawk hle niin a sawi.

Nimin khan ‘Mizoram State Project Monitoring Committee Annual Report 2024-25’ chu Chief Minister Lalduhoma chuan tlangzarhin hemi puala CM Conference Hall-a hun hman ah Chief Minister chuan Project Monitoring Committee cji Mizoram mipui aiawh zo tak ni tura din a nih thu sawiin, “Member tam tak nei vek Pawl hrang hrang hruaituten thukhat vuaa kan rama hmasawnna hnathawh in endikho hrim hrim pawh hi a ropui a ni,” a ti a. “Rawtna tha tak tak in rawn neih tawhte rinchhanin kal dan tha zawk kan kalpui bawk a. A tangkai em em a ni. Annual Report hmasaber in han zo a, tun atang chuan kan sawrkar hnua kan hmalakna lam te in en tan thei tawh dawn a. A tir atanga in vilpui hnate chu a tha tawh hle turah kan ngai,” tiin Project Monitoring Committee te hnathawh tawh chin chu a tha tawk hle tih a sawi a. “Kan ram tan hna tha in thawk mek a, in thawh tawh chinte pawh a tha tawk hle. Tumah hlau suh u. Ruling mi leh sa nih chhuang an lo awm a nih pawhin hlau suh u, in lamah kan tang zel ang,” tiin an hmalak zelna turah huai taka kal turin a chah bawk a ni.

He hunah hian MSPMC-a Member Secretary Er. Lalthanzuala Ralte chuan Annual Report chungchang sawifiahin, an project endikte chu Work Profile format siama Planning Department atanga an lakkhawm a ni a. Heng project an lakkhawm atang hian mipui nek na leh bihchian ngai zual nia an hriatte zirchiangin a hmunah kalchilhin an hnathawh dan te, hnathawh tawh chin te, hna that leh that loh te, hmanraw hman chungchang te, expenditure chungchang te leh harsatna an tawhte an en a. Report fel tak ziah zel niin a hmuna hna en hma leh en zawh hnuah project neitu (Nodal Department) te, Executing Agency te leh Contractor te nen Pre & Post Visit Discussion an neih zel thin thu a sawi bawk.

MSPMC hian kum 2024-2025 sawrkar kum chhungin Mizoram chhunga project 47 an tlawh zinga 42 te chungchang he Annual Report-ah hian an dah a. Heng te hi Social Sector-ah 8, Education Sector-ah 10, Health Sector-ah 8, Communication (Road & Bridges)-ah 7, Veterinary Sector-ah 1, Fisheries-ah 1, Sports-ah project 5, Public Health-ah Project pakhat leh Agriculture Sector-ah project pakhat te an ni a. Project kal lai mek ni tawh lo, hman tangkai lohva dah tawl tak, uiawm tak tak Mizoram Polytechnic buildings District panga (5) Champhai, Kolasib, Mamit, Lawngtlai leh Siaha a mite tlawh telin, an dinhmun theuh te he report ah hian dah tel a ni a. Education Sector-ah thupui ah ‘Zoram Rohlu - Eklavya Model Residential School’ tih hmangin dah tel a ni bawk.