Serchhip leh Mizoram hmun hrang hrangah 'World Rabies Day' pualin Ui â hri venna pek a ni

Nimin September 28, 2025 kha khawvel pum-a Ui â hri venna ni, 'World Rabies Day' a ni a, Mizoram-ah chuan he ni pual hian Inrinni khan hmun hrang hrangah hun hman a ni.
World Rabies Day hi Ui â hri venna, Anti-Rabies Vaccine (ARV) hmuchhuaktu, Louis Pasteur thih champhaphak pualin kum 2007 atang khan kumtin September ni 28-ah hman thin ni mah se, kumin hian Pathianni a nih avangin Inrinni, September ni 27 khan hman a ni a, Serchhip-ah chuan Inrinni khan Mizoram Veterinary Council leh AH &Vety Department te bultumin Serchhip District AH & Vety Hospital-ah he ni pual hian hun hman niin Ui à hri danna (Anti-Rabies vaccine) a thlawnin pek chhuahna hun hawn a ni a.Ui 150 chuang hnenah hri danna hi pek a ni.

Aizawl-ah chuan Mizoram sawrkar-a AH & Vety. Department, Mizoram State Veterinary Council (MSVC) leh Indian Veterinary Association (IVA), Mizoram te tangkawp buatsaihin 'World Rabies Day' hi hman a ni a, he ni puala State Veterinary Polyclinic Hospital, Khatla-a hun hman chu AH & Vety Department-a Addl. Director (VS&PH) Dr. M. Zohmingthangi chuan kaihhruaiin Mizoram State Veterinary Council President Dr. Lalremliana chuan Ui â hri (rabies) chu natna hri hlauhawm tak a nih avanga vaccine tha taka lak a pawimawh thu a sawi a. Rabies chu a vei tawhte'n an thihpui ngei ngei thina ngaih a nih thu leh damchhuak sawi tur tlemte chuah an la awm thu sawiin, ram changkangah chuan he hri hi an buaipui vak tawh loh laiin Asia leh Africa ramah chuan mi tam takin an la thihpui a, abikin Ui seh avangin case a la tam phah hle niin a sawi.

Indian Veterinary Association, Mizoram President Dr. Robert Rualthankhuma pawhin Animal Feed Plant, Ramrikawn-a hun hmanah World Rabies Day lo chhuah dan chanchin tlangpui tarlangin, India ram pumah kum 2030 ralhma ngeia Ui â hri nuaibo tuma theihtawp chhuah a nih thu a sawi a. Ui â hri nuaibo turin Ui vaccine pek mai bakah Uiin a seh te'n hri venna vaccine an lak nghal thuai a tul thu a sawi bawk.

Kumin World Rabies Day thupui atan hian 'Act Now: You, Me, Community' tih chu hman niin, Aizawl District-a hmun pathum - State Veterinary Polyclinic Hospital, Khatla, Zemabawk North YMA Hall leh Animal Feed Plant, Ramrikawn bakah District Vety Hospital tinahte hun hman niin, a thlawna Ui â hri venna vaccine (Anti-Rabies Caccine) pek beihpui thlak a ni a. World Rabies Day pual hian Mizoram pumah Ui 2,600 te hri venna pek an ni a. He ni pual vek hian TV lamah mithiamte'n sawihona 'Panel Discussion' an nei tawh bawk a ni.