Serchhip District-a Bank te hmalak dan thlirlet

Serchhip District chhunga Bank te hnathawh dan thlirletin nimin khan District Level Committee thutkhawm neih a ni.
He thutkhawm Serchhip DC Meeting Hall-a neih hi Bawrhsap leh Chairman Paul L. Khuma chuan kaihruaiin kumin March thla atanga June thla tawp Quarter chhunga Serchhip District-a Bank hrang hrangte hmalakna thlirho a ni a. Serchhip District-ah hian State Bank of India (SBI), Mizoram Rural Bank (MRB), Mizoram Cooperative Apex Bank (MCAB), Punjab National Bank (PNB), HDFC leh North East Small Finance Bank Ltd. (NESFB) ten Branch an nei mek a. Heng Bank hrang hrang a mipuite sum dahluh (Deposit) tlingkhawm chu cheng nuai 56971.09 a ni a, Bank ten loan an pekchhuah zat chu cheng nuai 40855.28 a ni a. Report atanga a lan danin Serchhip District chhunga Bank Branch hrang hrang 19-te deposit hmuh zat atanga mipuite hnena an puk tir (loan) zat Credit Deposit Ratio chu 2.67% a tlahniamin 71.71% a ni mek a. Quarter hmasa nena khaikhina CD ratio tlahniam Bank Branch 9 an awm a ni.

Kumin March-June Quarter chhung hian Serchhip District-a Bank ten Priority Sector-a Loan an pekchhuah zat target za zelah 9.29 an tlin tawh a. MSME-ah target za zela 15.29 an tlin tawh bakah Agriculture-ah 7.45% an tlin tawh a. Priority Sector bikah District chhunga Bank hrang hrang atanga loan puk mi 8121 an awm a, heng zinga mi 446 te hian an rul tha lo a. Loan chhia (Non Performing Assets) tlingkhawm hi cheng nuai 1200.25 a ni.

Bank te hi thlatin vawi khat tal Financial Literacy Campaign nei tura bituk an ni a. Serchhip District chhung hmun hrang hranga Bank Branch-te hian campaign vawi 23 an nei hman a ni. Nimin-a thutkhawm ah hian Lead Bank Manager Lalnghawrliana bakah Serchhip District chhunga Bank Branch hrang hrang Manager te leh Department thenkhat aiawh an tel a ni.