Kan fimkhur loh vanga chhiatna a tam tih sawi

Disaster Management & Rehabilitation Department changtu Minister Prof. Lalnilawma chuan khuarel chhiatna thleng tam ber chu keimahni fimkhur loh avanga kan thlentir (Man-made) a nih thu a sawi.

Mizoram State Emergency Operation Centre (SEOC) lungphum phumna puala nimin-a Aizawl-a P&E E-In-C Conference Hall-a hun hman ah he thu hi sawiin DM&R Minister Prof. Lalnilawma chuan “Khuarel chhiatna kan tih hi khuarel a ni chiah em? Nge keimahni thlenchawp (Man-made) zawk?” tiin, “Mizoram, a bik takin Aizawl khawpuia khuarel chhiatna thleng tam ber hi keimahni fimkhur loh avanga kan thlentir (Man-made) a ni. Chuvangin leilung chunga kan kutthlak dan hian chhiatrupna thlen kawngah kawngro a su hle tih hre thar ila. Kan bawlhhlawh leh tuichhe paih danah te, kan In sakna tura lei kan laih danah te mitin I fimkhur tlang ang u,” a ti a ni.

DM&R Minister chuan Mizoram-ah hian chhiatrupna a thleng zing ve ta hle tih pawh sawiin, chhiatrupna a lo thlen changa rang taka District hrang hranga DEOC te hmalak dan lo monitor a, State Level-a ruahmanna siam ngai te lo siamna hmun chu SEOC a nih thu leh a pawimawh thu a sawi a. “SEOC changtlung tak kan han nei mai tur hi ka lawm takzet a, DM&R Department tan chuan thil chhinchhiah tlak a ni,” a ti a. Lirnghing-a building dang a lo tluk palh pawhin SEOC chu a tluk ve a thiang lo tih rilru nena SEOC hi sak tum a nih thu pawh sawiin, Contractor hnenah a tha thei ber anga hna thawk turin a hrilh bawk a ni.

Nimin-a he hun hman hi DM&R Director R. Vanrengpuia chuan kaihruaiin Report atanga a lan danin SEOC hi MINECO (Open Gym) bula sak tur a ni a, a sakna tur sum hi SASCI,2024-2025 atanga hmuh a ni a. Sanctioned Amount chu cheng vbc. 18.50 niin Contract amount chu cheng vbc. 14.90 a ni thung. A sak hna hi Nidhi Creative Infrastructure, Silchar, Assam ten an thawk dawn a. Zopa chhiara chhawng 8 (G+7) a ni dawn a, a building pumpui zau zawng hi 4138.50Sqm a ni.