Mizo Territorial Army din tura hmalakna thlirho a ni

Mizo Territorial Army din tura hmalakna kal mek chu nimin khan Lt. Col. Clement Lalhming-thanga MLA hovin sawiho a ni.

Secretariat Conference Hall-II a he thutkhawm ah hian Aizawl Territory Army (TA) Company awm lailawkna tur, Bung Bangla-a Institute of Hotel Management hmun thawmthat hna kal mek dan te, Territorial Army lak dan tur kalhmang te leh Territorial Army Company thar din dan tur te sawiho a ni a. PWD aiawh atangin Bung Bangla-a TA awm lailawkna tur hmuna building pathum - Main Building/Administration Building, Girls Hostel leh Restaurant Building thawmthat hna thawh zawh tawhte leh hna thenkhat khaihlak chhante ngaihthlak a ni a. PHE Department leh P&E Department aiawhte pawhin an hmalak tawhna te leh an hmabak te an sawi bawk a. Heng department-te hian Finance Department leh Home Department aiawhte hnenah sum dinhmun leh an sum mamawhnate an thlen nghal bawk a ni.

He hunah hian Territorial Army, Aizawl Company-a Officer-in-charge Lt. Col. Goldi Bora hnen atangin TA awm lailawkna hmun tur tih-changtlun nana la mamawhte leh hna lak kalpui dan turte ngaihthlak a ni a. 23 Sector Assam Rifles DIG Brig. Pushpendar Sorayan pawh he hunah hian telin, Mizoram-in ramdang a thenawm avang leh TA chu ram venhim hna pawimawh thawktu a nih dawn avangin hna laka fimkhur a pawimawh thu a sawi a ni.

Mizo Territorial Army, Aizawl Company hnuaiah hian mi 150 lak tur niin, November vel atanga hna lak kalpui tan tum a ni a. Nimin a thutkhawm ah hian Home Department, GAD, Land Revenue & Settlement, Planning & Programme Implementation, PWD, Finance, Sainik Welfare & Resettlement, I&PR, Mizoram Youth Commission, PHE, P&E Department leh State Intelligence Bureau aiawhte an tel a ni.