Mizoram-a National Highway thawmthat ngai te rang taka thawmthat thuai a duh thu CM in a hrilh

Chief Minister Lalduhoma chuan Mizoram-a National Highway thawmthat ngai te rang taka thawmthat thuai a duh thu NHIDCL hotute a hrilh.

Nimin khan Chief Minister Lalduhoma hovin CM Conference Hall-ah National Highways & Infrastructure Development Corporation Limited (NHIDCL) ten Mizoram-a kawngpui an sial mek te enpuiin Review Meeting neih a ni a, he hunah hian Chief Minister Lalduhoma chuan National Highway te thawmthat (repair) ngai a tam leh tawh thu leh lirthei tana tlan harsa khawpa chhia a tam leh tawh hle tih sawiin, Contractor Liability Period chhunga mi vek an la nih angin rang taka thawmthat thuai a duh thu NHIDCL hotute a hrilh a. By-pass Road kawng thar an laih hnua khaw chhung kawngpui, State PWD hnena an la hlan loh te a rang lama hlan tur te, Aizawl to Vairengte kawngpui chu ngaihpawimawh bik (priority) a nei tur tein a chah a. Central sawrkara Rigid Pavement hmanga kawngpui sial tawh zawk tura a rawtna zirchiang tura hmalakna kalpui rang turin a chah bawk. Hemi thuah hian Union Minister for MoRTH Nitin Gadkari chuan Mizoram-a Rigid Pavement hmanga kawngpui sial chungchang lo zirchiang turin NHIDCL te hi a hrilh tawh a ni.

Heng bakah hian Chief Minister chuan Thingfal-a Mamte ‘T’ Baptist Kohhran Biak In chim chungchang pawh a sawi chhuak a. NHIDCL hotute chuan Deputy Commissioner Office-in Assessment an neih tawh thu leh an Assessment chu Project Management Unit-ah an thehluh tawh thu an sawi a. Anni hian NHIDCL Headquarters lama an kaltir zel tur thu an tarlang a. Chief Minister-in hna hmanhmawhthlak leh ngaihpawimawh ngai bik a sawite chu Mizoram Regional Executive Director Adelbert Susngi chuan chak taka an bawhzui tur thu a sawi bawk.

He thutkhawm ah hian NHIDCL lam hian an hnathawhna hmun hrang hranga harsatna an tawhte Chief Minister hnenah hian an thlen ve bawk a. State P&E Department nena hmalakho an mamawhna hmun te, ram neitu chiang lo chinfel la ngai te, Aizawl Eastern Side By-pass Road laih tura harsatna an tawh mek te, zangnadawmna lama harsatna an tawh hrang hrang te, mi thenkhatten kutthlak an phal loh vanga hna an thawh theih lohna hmun te leh chak zawka hna an thawh theih nana an mamawh dangte an tarlang a ni.

Nimin-a thutkhawm ah hian State sawrkar atangin PWD Minister Vanlalhlana bakah Vanlaldina Fanai, Commissioner & Secretary to CM, PWD; K. Lalrinzuali, Secretary, P&E; Er. H. Zoramliana, E-in-C, PWD leh Official dangte an tel a a. NHIDCL atang pawhin an hotu pawimawh thahnem tak an tel bawk a ni.