MUHCS, CM Special Package leh Synod Hospital chungah Mizoram Poor Federation te an lawm

Mizoram Poor Federation chuan Mizoram Universal Healthcare Scheme (MUHCS) leh CM Special Package-a sawrkar hmalakna fakin, Synod Hospital-in MUHCS a zawm tur chu miretheite tan thil lawmawm tak a nih thu an sawi.

Nimin-a Aizawl Press Club-a thuthar thehdarhtute an kawmna ah Mizoram Poor Federation President Lawmthanga chuan Ministry hmasa ah khan Health Care-ah an inziahluh ve thu leh dam loh nikhuaa Hospital-ah Admit an nih phei chuan pawisa sen hmasak ngaiin, pawisa puk chawp te in an inenkawl a, dam chhuak lova Hospital an chhuahsan changte phei chuan, lusun leh leibat nen an phur a rit thin hle niin a sawi a. “Mi mawl te te leh chinchang hre lo ten kan senso Bill kan buaipui a ngai a, sawrkarin kan Bill lah chu rei tak tak min lo batsak a, Mi retheite kan chepin khatih laia sawrkarah khan beisei a bo hle a nih kha! ZPM Ministry-in Mizoram Universal Health Care Scheme (MUHCS) a duang a, heta inziaklut chhungkuate chu a thlawn veka enkawl kan nih bakah, thi emaw, dam emaw a Hospital kan chhuahsan pawhin Bill buaipui a ngai ve tawh lova, Mi rethei leh mi mawlte tan hlei hlei a thawventhlak takzet a ni,” a ti.

Chhan hrang hrang avangin Hospital tam zawkin MUHCS an zawm loh thu leh mi retheite dinhmun hrethiama MUHCS zawm ve hram tura an ngen hnuah mi tam takin an pan Synod Hospital a thuneitute leh sawrkar inbiakna in rah tha tak chhuaha Synod Hospital in MUHCS a zawm chu Synod hotute leh Synod Hospital hnenah thinlung taka an lawmthu Mizoram Poor Federation President chuan a sawi bawk.

Hei bakah hian ZPM Ministry-ah Term khat chu sawi loh, term chanve an la hman zawh hmaa Hand Holding Policy hnuaia Chief Minister’s Special Package pawh Trade mil zelin bul tanna tur Rs.1,00,000/- hmu pawh an awm bakah party thliar lova hma an lakna chu fakawm an tih thu Mizoram Poor Federation hruaitute chuan an sawi a. “ZPM hian an Campaign hlaah party dang angin Mi retheite hi Political Ball-ah an hmang ve vak lo nachungin an rorel dan hian Mi rethei hnen a thlen phak tlat avangin ZPM Ministry chungah lawmthu kan sawi e,” an ti a. Hei bakah hian sawrkar hna thenkhat, pawl 10 pass chin dilh theih tura tihte chu pawl 8 pass chin dil theih tura tihniam tura ngenna Chief Minister hnenah an thlen thu sawiin, khawsak harsatna vanga pawl 10 zir thleng phak lo ten Police leh Excise Constable-te bakah Department hrang hranga Group D leh Driver hna lak turahte hna an dil ve theih nan ruahmanna siamsak turin an ngen tih an sawi a ni.