Kumin August thla ah sawrkar in Chhiah a hmu tlem

Kumin August thla khan Mizoram sawrkar chuan Taxation Department kaltlangin Chhiah chi hrang hrang cheng vbc. 73 a hmu a, sawrkar kum kal meka Chhiah a hmuh tlem ber thla a ni a. GST atangin August thla vek hian cheng vbc. 63 hmuh niin kum 2 leh thla 5 chhunga GST atanga Mizoram sawrkarin Chhiah a hmuh tlem ber dawttu leh kumin-a GST atanga Chhiah a hmuh tlem ber thla a ni bawk.

Taxation Department Monthly Achievement-in a tarlan danin, sawrkar kum kal mek 2025-2026 ah April atanga August thla chhung khan kawng hrang hrang atangin Mizoram sawrkar chuan Chhiah cheng vbc, 568 a hmu a; a hmuh tam ber thla chu April thla kha niin cheng vbc. 179 a hmu a. Hetihlai hian Chhiah a hmuh tlem ber thla chu thla liamta August kha niin cheng vbc 73 chauh a hmu a ni.

Mizoram-ah kum 2023-24, kum 2024-25 leh kumin 2025-26 kal mekah hian sawrkar chuan GST atangin Chhiah engemaw zat a hmu tawh a; hemi kum 2 leh thla 5 chhung hian sawrkar chuan GST-a hmuh tlem lai ber chu September 2024 kha niin cheng vbc. 61 a hmu a. Kumin sawrkar kum kal meka thla liamta, August thla khan GST-ah hian cheng vbc. 63 hmuh a ni a; hei hi hriat theih chinah kum 2 leh thla 5 chhunga GST atanga sawrkarin Chhiah a hmuh tlem ber dawttu thla a ni.