Mizoram-a Rel suthlum ruang Postmortem a ni

Nizan hmasa dar 7:15 vel-a Kawnpui leh Mualkhang Rel Station inkar-a Rel in a suthlum Zonunzira (51) chu nimin khan a ruang Postmortem a ni.

Thudawn danin nizan hmasa dar 7:15 vel khan Kolasib District chhung Khamrang Rel kawng lei verh (Tunnel) No 35 bulah Zonunzira (51) hi Kolkata atanga Sairang pan Rel chuan a su a, a tirah amah hi hriat mai ni lo mah se Aizawl-a Greenland School neitu C. Lalthanzauva te huan enkawltu Zonunzira a ni tih finfiah a ni a, Tripura-a Naisingpara lam mi niin Bru a ni a, Khamrang ram chhunga Oil Palm leh Rubber huan enkawla inhlawh niin Rel kawng kan a tum laiin, Rel hi lo tlan thutin a chil ta ni-a hriat a ni a, a hmunah a thi nghal a ni.

Vanduaina thlen thu hi hriat a nih ve leh Kawnpui Police te chuan a hmun pan nghalin thil thlen dan an enfiah bakah tih tur pawimawh hrang hrang an tifel nghal a, nizan hmasa khan Kawnpui Police Station-ah a ruang hi lak niin Kawnpui CHC-ah Doctor an awm remchan loh avangin Kolasib District Hospital-ah nimin khan a ruang hi Postmortem a ni bawk.

Kawnpui Police-te chuan he vanduaina thleng chungchangah hian thih dan pangngai lova thi (Unnatural Death) hmangin thubuai ziahluh a ni tih an sawi. Railway Protection Force pawhin vanduaina thlenna hmun hi pan nghalin, thuneitu sang zawk lamah thil awm dan an thlen nghal a ni.

Hetihlai hian sawrkar thuchhuah chuan Rel kawng kan (cross) chu Railway Act 1989 Section 147 in a khap thu sawiin, thla ruk (6) chhung lung In tan emaw, Rs. 1000 chawitir emaw, a pahnih in emaw a hrem theih a ni tih an sawi a. Rel kawng te chu Foot-Over-Bridge hmanga kan tur a ni tih sawiin, mihring leh ranvulh ten vanduaina kan tawh loh nan Rel kawng leh a hnaih ah awm lo turin an chah bawk a ni.