Scholarship la sem loh ah mawhphurhna la turin phut

MNF Thalaite chuan July ni 7-a Ministry of Tribal Affairs-in Mizoram sawrkar hnena Tribal Scholarship cheng vbc. 50 chuang a pek tawh laia tun thlenga zirlaite hnen a la thlen loh chungchangah ZPM kaihhruai Sawrkar chu mawhphurhna la turin an phut.

Nimin-a Aizawl Press Club-a thuthar thehdarhtute an kawmnaah, MNYF Vice President Lalnunmawia Pautu chuan kum 2023-2024 inkarah zirlai 3981-in Scholarship an la dawng kim lo leh sawrkar kum kalta 2024-2025 Session Post-Matric zirlai 28459 leh Pre-Matric 8788-te'n Scholarship an la dawn chhan chu Mizoram Sawrkarin Scholarship Scheme chu a Department changtute rawn lovin SNA SPARSH MODEL-ah a lo ziahluh vang a ni tih sawiin, hei hi SASCI Loan a puk tam duh vang niin a sawi a. ZPM sawrkarin sum puk tamna atana SNA SPARSH MODEL-ah zirlaite a dahkham chu zirlaite a ngaihsak tawk loh vang leh sawrkar sum enkawl dan an thiam tawk loh vang niin a sawi.

MNYF hruaitute chuan kumin July ni 7 khan Ministry of Tribal Affairs chuan Mizoram sawrkar hnenah Rs. 50,42,81,000 a rawn pek tawh laia Vawiin thlenga zirlaite hnen a la thleng lo chu hriatthiam har an tih thu sawiin, ZPM kaihhruai Sawrkar chu a lo tihdik loh ah mawh lain Zirlaite Scholarship pek vat a nih theih nan tihfel ngai te tifel zung zung turin an phut tih an sawi a ni.