Retailer te hnenah Iris Scanner semchhuak tan; Ration Card siam kawnga harsatna sukiang mek

Retailer atanga buhfai la tur, Kut zungpui thla hmu thei lo te tana hman tur Mit naute enna (Iris Scanner) chu nimin khan Lawngtlai District-a Retailer te hnenah semchhuah a ni.

Lawngtlai DC Conference Hall-a Iris Scanner semchhuahna hunah hian Food Civil Supplies & Consumer Affairs Department Director Saizikpuii chuan Lawngtlai District-ah pawh e-KYC ti tura kutzung thla (Finger Print) E-POS Machine-in a hmuh theihloh engemawzat an awm tih sawrkarin a hria tih sawiin, Mizoram hmundangah pawh engemawzat an awm mek tih a sawi a. Mizoram pumah tun dinhmunah 'e-KYC' la tifello mi sing hnih chuang an la awm tih tarlangin, EPOS Machine atanga Kut zungpui thla hmuh theih lohte chu Mit Naute atanga hmuhtheih a nih vangin Sawrkar chuan Retailer-ten an hman tangkai turin Iris Scanner chu a semchhuak tan tih a sawi a ni. FCS&CA Director chuan Ram pawna awm tiam lohin, India ramchhunga awmte tan khawi hmunah pawh awm ni se, an hnaih ber Retailer atangin e-KYC hi tihfel theih a nih thu a sawi a. E-KYC hi ngaihthah a nih chuan mihring awm reng siin, an buhfai dawn tur sawrkar laipui atangin hmuh theih a nih loh avangin harsatna a thlen thei tih a sawi a, hei vang hian Retailer-te chu an huamchhung theuhah 'e-KYC' ngaipawimawh thar turin a chah bawk.

Iris Scanner semchhuahna inkhawm hi Lawngtlai DCSO Lianchhuma Chinzah chuan a kaihruai a. Lawngtlai Centre-a Retailer te chu Iris Scanner hman dan zirtirna neih nghal a ni a. Lawngtlai DCSO huamchhungah hian Retailer 139 awmin nimin khan Iris Scanner hi Lawngtlai Centre-a Retailer 35 hnenah semchhuah a ni a, Retailer dangte chuan DCSO Office atangin 'Iris Scanner' hi an la leh dawn a ni.

Hetihlai hian hun rei tak Ration Card siamna kawnga harsatna thleng chu sutkian chhoh mek zel niin a hmaa tih theih loh hrang hrangte chu tih theih a ni chho mek a, thudawn danin tunah hian Ration card bo print thar te; Ration Card Transfer te; Ration Card atanga paih leh Card thar siam te tih theih a ni tawh a. Member thun belh chungchang ah Ration Card-a la chuang ngai miah lo te chu thun thar theih an ni tawh a, Ration Card dang atanga sawnchhuah tur erawh la tih theih lovin naupang kum 6 hnuailam pawh thun theih an la ni rih lo a, heng te pawh hi thun theih tura hmalak mek niin Member thun thar leh Card siam thar zawng zawng te Office-ah details an dahluh zawhah Retailer khawl (epos machine)-ah eKYC tih phawt tur a ni anga. Hei bakah hian OTP hman a nih zel tawh avangin Ration Card siam tir turin Ration Card a hming chuang ngei phone kengin kal tur a ni bawk.