Khawvel-a ri hriatna chak lo 1.5 billion vel awm

Khawvel pum-a mihring tluklehdingawn 1.5 (1.5 billion) vel chu ri hriatna chak lo an ni.

Kumtin September thla Pathianni hnuhnung ber-a hman thin ‘World Day of the Deaf’ chu nimin khan hman leh a ni a, World Day of the Deaf hi kum 1958 September thla atang khan hman a lo ni tawh thin a. Geneva Headquarter in a rel angin he Ni hian a tum ber chu Bengngawng te harsatna hriatthiam pui tur leh bengngawnna ti tlem tura mipui te hnena zirtirna zau zawka thehdarh a ni. Hei bakah hian zaizir-a inbiakna tun aia hman uar leh Bengngawng te tan inkiltawihna ti ziaawm tura hmalak te chu a tum ber a ni.

WHO in a zirchianna ah chuan Bengngawnna hi kan thil hriatna (Sensory organs) panga zinga piansualna ah a tam ber a, tunah hian khawvel pumah mihring tluklehdingawn 1.5 (1.5 billion) vel hian ri hriatna chaklo an nei a, heng zinga maktaduai 430 te chu an beng a ngawng a, tun ang zela kan kal chho anih chuan kum 2050-ah chuan mihring 10 zelah 1 chu an beng a ngawng dawn a chhut a ni. Hetiang anih avang hian kan beng hi kan enkawl uluk a ngaiin bengngawnna thlentu hrang hrang lakah kan inven fimkhur a ngai hle a. Beng natna chi hrang hrang bakah beng ri hriatna chaklo thlen thei damdawi lakah te leh Ri bengchheng nasa lakah te kan inthiarfihlim a pawimawh tih mithiam te chuan an sawi a ni.

Hemi kawnga hma la tur hian National Programme for Prevention and Control of Deafness (NPPCD) chu kum 2014, August thla atang khan Mizoram-ah pawh National Health Mission (NHM) hnuaiah din tan a ni a. kumin April atanga July 2025 thlenga record in a tarlan danin NPPCD hnuaiah hian Damlo mi 11,166 en niin Bengngawng mi 2029 hmuhchhuah an ni a, Beng natna nei mi 2517 en an ni tawh a, Bengdar pawh mi 43 hnenah pek niin mi 642 chu Bengdar dawng turin refer an ni bawk a. Hemi kawngah hian RBSK, NILD - NERC ALIMCO te nen Bengdar sem kawngah hian an thawkho mek bawk a ni.