Sazu puang-ah mipuite fimkhur turin an chah

Health & Family Welfare Department-a Integrated Disease Surveillance Programme (IDSP) chuan Sazu puang chungchangah mipuite chu fimkhur turin an chah.

Hemi chungchanga IDSP thuchhuah in a tarlan danin tunlai hian Mizoram hmun hrang hrangah Rawthing (mau) tam vangin Sazu a puang a, Lunglei District-a Mamte leh Lungrang khua ah te, Serchhip District-a Khawbel khua ah te leh hmun hrang hrangah chuan Buh an seh chhiat vangin tura hrai te a nih thu leh Sazu hian mihring a natna chi hrang hrang thlen theitu natna hrik engemaw zat an put darh thin thu an tarlang a. Heng natna te hi Sazu in an seh leh an ham (Scratching) atang te, Zun leh ek (Excrement) atang te; Thawk luh (Inhalation); Kut lawnga khawih (Handling; Ran dang eg: zawhte leh ui in an man atanga tihpalh thil vanga kaichhawn (second-hand contact) leh Hrik hmanga an thehdarh theih thu an tarlang.

Sazu te hian mihring-ah natna chi hrang hrang thehdarh theiin heng zingah hian Plague, Rat bite fever, Leptospirosis, Scrub Typhus leh natna dang dang a tel thu sawiin, heng natna te hi Khawsik, Tha na, Tihrawl na, Chau, Thalbe vung (swollen lymph nodes), Pumna leh kawthalo, Luak, Ruh-chuktuah vung leh na leh Taksa durh leh pan (bubos) angin a langchhuak tlangpui tih an sawi a. Heng natna/ insawiselna kan nei a nih chuan nunna atan a hlauhawm avangin a rang thei ang berin Doctor hnai berah inentir tur a ni tih an tarlang a ni.

Hei bakah hian heng natna te kai lo tura kan inven that a pawimawh thu pawh tarlangin, In leh a vel vawnfai te, Inchhung a Sazu luh theihna tur kua leh awng tih phui te, ei leh in ningnawi paihna felfai tak siam leh Sazu luh theih lohna tura siam te, Thang/Sazu ban kam te leh a tul chuan Tur (rat poison) hman tur a nih thu pawh tarlangin, “A nung lai kan man emaw, a thi kan khawih dawn a nih pawhin kut lawnga khawih loh tur a ni,” tiin hri kai te chuan Sub-Centre emaw, Damdawi In emaw pan vat tur a nih thu an tarlang bawk a ni.