Boxing Championship khelh mek titawp turin hriattir

Mizoram State Sports Council (MSSC) chuan Lunglei-a Mizoram State Sports Council (MSSC) Golden Jubilee 44th Mizoram State Boxing Championship khelh mek chu titawp nghal turin nimin khan a hriattir.
Hemi chungchanga Mizoram State Sports Council (MSSC) Secretary in nimin-a Mizoram Boxing Association hnena lehkha a thawn ah Mizoram Boxing Association buatsaih, Mizoram State Sports Council (MSSC) Golden Jubilee 44th Mizoram State Boxing Championship, Lunglei a khelh mekah POCSO Case-a a tuartu (victim) hmeichhe Boxer te khelh ve an phal lo ni a puhna chungchangah Child Welfare Committee (CWC), Aizawl District atanga Mizoram State Sports Council-in hriattirna an dawn bawhzuiin he inpuhna hi thu diklo a ni emaw, chhan tha tak avanga khelhtir phallo an ni tih an insawifiah hma chu 44th Mizoram State Boxing Championship khelh mek chu titawp nghal turin a hriattir a ni.

Lunglei-ah hian September 23 - 26, 2025 chhung hian MSSC Golden Jubilee 44th Mizoram State Boxing Championship hi khelh tura ruahman niin he Championship-ah hian mipat hmeichhiatna lam rawng kaia Boxer te lo khawih thin avanga POCSO Case-a Jail tang mek MIZBA ROC Chairman, T. Lalthlengliana thlavang MIZBA in an hauh avangin Serchhip District Boxing Association te chuan an District aiawha khelh tur Hmeichhe Boxer pathum te chu POCSO case file-tu te an nih avangin khelh tir an phal lo niin an hria a. Boxer te thlavang hauh lova a khawih chingpen tumtu thlavang MIZBA in an hauh zawk chu mak an tih thu sawiin, heng mite hi khelh tir ngei turin an ngen bawk a. He an ngenna hi tih hlawhtlin a nih loh avangin Serchhip District atanga Boxer leh R&J Official Duty tura kal zawng zawngte chuan Lunglei hi an chhuahsan nghal a. Hetianga thu a rawn tlangthan hnu hian hetiang hian hmalakna pawh a kal chho zui ta a ni.