CAG Report in bawlhhlawh senghawi dan sawisel

Comptroller & Auditor General of India (CAG) report hnuhnung ber chuan Mizoram khawpui thenkhata bawlhhlawh senghawi dan chu mihring tan a hlauhawm hle niin a sawi.

CAG report chuan Mizoram khawpui thenkhat a bawhhlawh chi hrang hrang paih leh senghawi dan chuan mihring hriselna a khawih chhiat theih bakah boruak tichhiain ram leilung chhiatna bakah tui leh thing leh mau leh nungcha thlengin dinhmun hlauhawm ah a dintir niin a sawi a. Solid Waste Management Rules, 2016-ah chuan bawlh-hlawh chi hrang hrang sawngbawl tura a lakkhawm, then hran, dahkhawm, phurh sawn leh paih dan tur fel taka ziahlan a ni a. CAG Audit atanga a lan dan chuan Solid Waste Management Rules 2016 hian khawpui hrang hrangah zawm a hlawh lo nasa hle a. Bawhhlawh senghawi dan hi a him lovin a nih dan tur anga kalpui a ni lova, a senghawi hnathawktute himna tur ngaihthah a nih bakah sum leh pai hman dan pawh a langtlang lovin mawhphurtu awm lo ang mai a ni, a ti.

CAG report chuan bawlhhlawh tling-khawm zat hi a bukna (weighbridge) a awm loh avangin a hriat theih loh a. Bawlhhlawh zat hriat theih a nih loh avangin a senghawi dan tur fel taka duan theih a ni lo tih sawiin, bawlhhlawh tlingkhawm awmze nei a thliarhran a awm lova, bawlhhlawh phur lirtheite pawh khuh lohin an tlan mai a, endik turin GPS hman a ni hek lo. Aizawl khawpui-ah pawh bawlhhlawh senghawi dan tur dik tak anga kalpui a awm lova, Lunglei leh Lawngtlai khawpui-ah te phei chuan a paihna hmun bik ruahmanna a felhlel hle a. He'ng khawpui pathumah te hian a tihdan tur anga sawng-bawl lohva pawn lera bawlhhlawh paih mai mai a nih bakah hmun thenkhat phei chuan an hal khu vut vut niin a tarlang bawk a ni.