GST Rate hniam hnuah Taxation in hma an la zel

India ram puma September ni 22, 2025 atanga Goods and Services Tax (GST) 2.0 Reform hman tan a nih hnuah bungraw tam takah GST rate tihhniam a ni a. Hemi rual hian bungraw man pawh a tlawm phah a. Mizoram-ah erawh chuan sumdawng thenkhatin GST rate thar anga an bungraw man an la tihhniam loh avangin Taxation Department chuan enfiah hna an thawk mek.

Taxation Department hotute hnen atanga thudawn danin, GST rate tihhniam a nih hnuah pawh a man la tihhniam ve lo sumdawngte, GST Registration nei reng chunga Invoice pechhuak lo te leh GST Registration lem hmangte chungchangah mipui hnen atangin report an dawng nual a. Heng report-te hi Taxation Department hnuaia Quick Response Team-te'n an bawhzui nghal zel a. Dan tha taka zawma sumdawng an awm laiin, dan bawhchhia leh hremna pek ngai hmuhchhuah an awm nual tawh bawk niin an sawi a ni.

Taxation Department hotute chuan dan lova sumdawngte leh Invoice pechhuak thin lo te lakah hma an la chhunzawm zel dawn tih an sawi a. Hetih rual hian sumdawng fel tak, dan thar kalhmang leh bungraw man siamrem dan tur hrechiang duha zawtfiah duhte pawh an pung zel tih an sawi a. Department hotute chuan dan zawma sumdawnna kalpui duhtu an pung zel chu lawmawm an tih thu an sawi bawk a ni.

Mipuiten thil an lei apianga Indirect Tax an pek thin avangin GST dan hnuaiah an dikna leh mawhphurhna hrechiang turin Taxation Department chuan ngenna an siam a, lungawi lohna neite chu complaint thehlut zel tura chahin, Complaint thehlut tute hming hi  thup sak zel a ni ang tih an sawi a. GST rate thar anga thilman hniam tura ngaih, hniam si lote chu Phone No. 0389-2336167 bakah Mobile Phone No. 8415065109 leh 9862581640-ah hriattir tura ngen an ni a, Taxation Department Office hrang hrangah te pawh complaint thehluh theih a ni.