GST Rate thar zawm nghal vek tur a nih thu sawi

Taxation Department-a Commissioner of State Tax, HK. Lalhawngliana chuan Goods and Service Tax rate thar sawrkar laipuiin a siam angin Mizoram-ah pawh sumdawng zawng zawng ten GST rate thar hi nimin atang khan an zawm nghal vek tur a ni tih a sawi.

DDK Palai zawhna chhangin Commissioner of State Tax HK. Lalhawngliana chuan, GST rate thar siam ang hian sumdawngte chuan an hmang nghal ang a, MRP inziaka a rate alo hniam a nih pawhin MRP awmsa thaichhe lovin, bungrua-ah ziakin emaw, an bel thar thei ang tih a sawi a. Cement bikah chuan an bungrua laksa emaw, dahkhawlsa (stock) an nei a nih chuan rate thar hi an zawmin an zuar tur a nih thu sawiin, Dealer leh Agent-te kaltlang lem lova GST chawi lem lo-a lo late an awm a nih pawhin GST rate thar hi an hmang ngei ngei tur a ni a, an lo ti lo a nih chuan anmahni in an chawi mai tur a nih thu Commissioner of State Tax chuan a sawi a ni. 

Sawrkarin GST rate thar a siam zawmlo emaw, dan lo anga an bungrua te an hralh chhuak emaw a nih chuan hremna GST Section 171-na Rules 122 atanga 137-a hrem theih an ni ang tih a sawi a, an Chhiah pek tur bakah sumfai an chawi thei tih Commissioner of State Tax chuan sawi bawkin Mizoram chauh ni lovin India ram pumpuia hman nghal a ni dawn tih a sawi a. Hetiang lama Dan bawhchhiate enthlithlaia ngaihtuahtu Anti-Profiteering Board thlenga bawhchhiatna a luh chuan hremna a rit hle tih Commissioner of State Tax chuan a sawi bawk.