AMC-ah Electoral Roll ennawn hna thawh tan a ni

Aizawl Municipal Corporation (AMC) Inthlanpui neih tur atana inbuatsaihna kal mekah Electoral Roll ennawn hna chu thawh tan niin nimin khan Draft Electoral Roll chu tarchhuah a ni.

AMC Electoral Roll ennawn tur atan hian Aizawl DC Conference Hall-ah District Municipal Election Officer leh District Bawrhsap Er. Lalhriatpuia chuan Draft Electoral Roll hi a tlangzarh a, mipuite en theih tura tarchhuah a nih bakah Political Party hrang hrangte hnenah a copy semchhuah nghal a ni a. Democracy rama inthlanna felfai, langtlang leh thianghlim neih tur chuan Electoral Roll thianghlim leh felfai atanga bul tan a tul thin thu Bawrhsap chuan sawiin, Final Electoral Rolls felfai leh thianghlim tak an neih theih nan Political Party, tlawmngai pawl leh LC te thawhpuina leh tawiawmna an mamawh thu a sawi bawk a ni.

AMC-a Electoral Roll ennawn ah hian nakum (2026) January ni 1-a kum 18 tling chin chu tehfung-ah hman tur a ni dawn a, AMC-ah hian Ward 19 awmin Vawiin, September 25 atanga thla thar, October 25 thlengin hming thun thar, paih, siamthat ngai leh insawn duhte tan dilna hun hawn a ni dawn a, hemi hun chhunga dilna lut te chu November 25, 2025 thleng endikin heng te hi zawhfel vek a nih hnu December 7, 2025-ah Final Electoral Roll chu tarchhuah a ni ang.

Draft Electoral Roll atanga a lan danin AMC Ward 19-ah hian Vote nei mipa 1,08,649 leh hmeichhia 1,25,951, an vaiin 2,34,600 an awm a, AMC Electoral Roll hi MLA Electoral Roll nen a thuhmun loh avangin hming thun thar, paih, siamthat leh insawn te hi MLA Electoral Roll atan rin nghal theih a ni dawn lo a ni.