Malsawmna thuah 2 niin sawi

BJP MLA leh Palak Bialtu K. Hrahmo chuan sawrkar laipuiin GST a siamthat avanga thilman tlawm tawh tur leh Railway Service avanga bungraw phurh man a let-a a tlakhniam dawn avangin Mizoram in ‘Malsawmna Thuah hnih’ a dawng niin a sawi.

Nimin-a Aizawl Press Club-a GST chungchanga thuthar thehdarhtute a kawmnaah K. Hrahmo chuan Prime Minister Narendra Modi-a’n kumin Independence Day-a mipui nawlpui nitin mamawh lei leh hralhnaah harsatna an tawh thin tizangkhai tura hmalakna pawimawh tak GST next generation reform kalpui a nih tur thu a lo puan tawh bawhzuiin September ni 22 atang khan ram pumah a taka hman tan a ni chu lawmawm a tih thu a sawi a, GST rate tihhniamin a tum lian ber chu mipui nawlpui banphak leh man man zawka lei theih tura thil man siamthat a ni a, sumdawng ten a man an tihniam ngei tur a ni tih sawiin, GST rate tihhniamna bungrua leh thil zuarte zingah a man tihniam lo report lut a awm chuan dan angin action lak theih a ni tawh tih a sawi bawk.

He hunah hian BJP State Vice President Malsawmtluanga chuan Sairang-a Rêl lo lut avanga Mizoram mipui ten nasa taka a hlawkna kan chhawr thei tur chu a lawmawm tih sawin, Sairang Railway chu mamawh ang zela Bungraw phur chi (Rail Wagon) te a tul ang zel a tihpun a ni dawn tih a sawi a, Rel a thil phurh man chu a tlawm hle nia sawiin, Guwahati to Sairang a bungraw phurh man kg. ah Rs. 2 niin, Delhi to Sairang pawh kg. ah Rs. 3 chauh anih thu a sawi a. Road Transport-ah erawh Guwahati to Sairang chu kg. ah Rs. 7 leh Delhi to Sairang chu kg. ah Rs. 20 a ni thung tih a sawi a, “Hetiang anih vang hian thil phurh man a intlawm hleih em em mai bakah Rel chuan a thleng hma êm êm bawk a ni. Hengte avang hian Sairang-a Rel lo lut hi Mizoram chuan nasa takin kawng hrang hranga kan hlawkpui ngei kan beisei,” a ti bawk.