Consumers tan ‘Vantlang Viltu’ hman tangkai theih a ni tawh

Serchhip District Consumer Association (SDCA) chuan ‘Vantlang Viltu’ apps chu Consumers te tan tangkai taka hman theih a nih tawh thu an sawi.
Serchhip District Deputy Commissioner Office in Serchhip District mipuite tana lungawilohna thlenna tur atana an siam Mobile Apps, ‘Vantlang Viltu’ tih chu Consumer ten an dikna leh chanvo humhalhna tura harsatna an neih te an thlen ve theih nan District Consumer Association ten Deputy Commissioner hnena an ngen angin ruahmanna siam a ni a, hei hi lawmawm an tih thu SDCA chuan sawiin, he thil hi District huamchhunga Consumer te tan chuan thil pawimawh tak leh hmasawnna lawmawm tak a nih thu an sawi a. “He ‘Vantlang Viltu’ apps atang hian Consumer ten kan harsatna hrang hrang Gas chungchangah te, Petrol leh Diesel chungchangah te, Service hrang hrang kan dawn chungchangah te, Thil lei leh hralh chungchangah te leh a list a tarlan kher loh thil dangah te kan harsatna te a complaint zung zung theih dawn a. Complaint lut te chu rang taka hmalak sak a, a tul anga Consumer Court lam thlenga bawhzui anih theih nan ruahmanna siam a ni,” an ti.

Serchhip District chhung hmun hrang hranga Consumer tena midang hriat lemloha harsatna an lo tawk emaw, puih an ngaihna laiah an inpuih tawn theih nan he Mobile Apps hi hmang tangkai theuh turin District Consumer Association te chuan mipuite an ngen a, “He thil tangkai tak hi Serchhip District chhunga Consumer zawng zawng ten hmang tangkaia kan lungawilohna leh kan harsatna te chinfel anih theih nan he Mobile Apps hmanga lo thlen thin turin kan inngen a ni. He ‘Vantlang Viltu’ Mobile Application hi Android leh ios hmang te tan phone apps store atangin awlsam taka download leh hman mai theih a ni,” an ti bawk.