Tuivai HP nasa zawka bawhzui tura rel a ni

Power & Electricity Minister F. Rodingliana hova sawrkar mi pawimawh thukhawm chuan Mizoram Sawrkarin Hydel Project thar a buaipui mek kawlphetha Megawatt 132 tharchhuak thei tur Tuivai Hydel Project chu nasa zawka bawhzui an rel.

Zirtawpni khan P&E Minister F. Rodingliana hovin a Pisa-ah Power Supply Load Shedding kalpui thin dan leh hemi kaihhnawih Central Electricity Regulatory Commission (Ancillary Services) 2022 kalpui dan tur chungchang sawihona neih a ni a, he thutkhawm ah hian Load Shedding kalpui a ngaih chhan tarlan niin, Mizoram in power a hmuhna pui ber Tuirial Hydel Power Station atanga power lakna, 132kV Line-ah harsatna a awm changin kan power mamawh (demand) phuhru turin hmundang (Generating Station) atangin ruahman (schedule) sa ni lo power lak luh ‘overdraw’ a ngaih thin thu tarlan a ni a. Overdrawal, ruahman sa ni lo atanga lak hi tih a nih loh chuan power mamawh zat kan hmuh theih loh avangin Load Shedding kalpui a ngai ta thin tih sawi a ni a. Tuirial Hydel Power atanga kawlphetha lakna line dang, Tuirial 2nd Evacuation Line siam mek ni mah se zawh a la nih loh avangin harsatna hi a awm phah ta thin tih tarlan a ni.

Central Electricity Regulatory Commission chuan Indian Electricity Act 2003 in thuneihna a pek angin CERC (Ancillary Services) Regulation 2022 a duang chhuak a. He Regulation hian eng State pawhin National GRID atanga a power dawn tur bituk (schedule) aia tam a la (overdraw) a nih chuan a overdraw-na zat (quantum) hi a rang thei ang berin Grid-ah chhunglut (recover) nghal turin a ti a ni. Hemi atan hian State tin te chu kum 2026-27 atang chuan reserve power nei turin a ti a, an reserve neih zat tur pawh a hma kum-a an overdraw zat (quantum) atangin National Load Despatch Centre (NLDC) in a chhut sak vek dawn a ni.

Kum 2024 chhunga overdraw atanga chhutin Mizoramin reserved power a neih ngai zat chu 75 MW a ni a, hemi atanga a lan dan chuan kumtin cheng vbc. 75.6 vel sen belh a ngai dawn tihna a ni a. Kum 2026-2027 a power reserve kan leina senso tur chu tun kum kal lai mek 2025 a kan overdraw quantum atangin chhut a ni ang. Chutihlai chuan ‘overdrawal’ tih avangin Mizoram Sawrkar in August 2025 chhung chauha a pawisa a chawi (penalty) hi cheng nuai 85 chuang a ni thung.

Heng harsatna te pumpelh tur hian State chhunga tharchhuah ngei power hmanga intodelh a tul zia he hunah hian tarlan niin chumi atan chuan Mizoram Sawrkarin Hydel Project thar a buaipui mek Megawatt 132 tharchhuak thei tur Tuivai Hydel Project pawh nasa zawka bawhzui tura rel a ni a. Tuivai Hydel Project hi a tirah Public-Private-Partnership (PPP) Mode a tih tum ni mah se Mizoram Sawrkar ta liau liau a nih theih nan a tul anga bawhzui tura rel a ni bawk.