Assam Rifles ten ralthuam thahnem tak an man

India leh Myanmar ramri veng-a duty Assam Rifles te chuan tunhnai khan Champhai District a Saikhumphai-ah ralthuam thahnem tak an man.

    Assam Rifles thuchhuahin a tarlan danin an thudawn bawhzuiin ramri vengtu Assam Rifles te hian India leh Myanmar inrina bula awm Saikhumphai bul ramngaw chhah tak chu dapin Zirtawpni zing khan ralthuam thahnem tak an hmuchhuak a, an ralthuam hmuh chhuahte hi - Germany siam Heckler & Koch G3 Assault Rifle pakhat; US siam Springfield Sniper Rifle pakhat; 60 mm Mortar Tube pakhat leh Rifle chi hrang hrang mu 21 bakah grenade 13 te a ni a. Heng bakah hian bomb tihpuahna Cordtex hrui metre 8, bomb palpuahna hrui trip wire 2, Sniper Rifle chunga chhuan chi entlang, Rocket Propelled Grenade (RPG) extender 2, AK-47 Assault Rifle leh Pistol magazine pakhat ve ve, Radio Set leh antenna 2, antenna dang bakah thildang engemawzat an hmu-chhuak a ni. Assam Rifles hian an ralthuam man te hi Dungtlang Police Station-ah chhui zui turin an hlan a, mihring man erawh an nei lo a ni.