Aspirational District, Mamit a hmalakna a hmunah enfiah

Sawrkar laipui atanga Aspirational District, Mamit viltu Prabhari Officer Padmini Singla-i chuan nimin khan Mamit tlawhin Mamit khawpui chhunga hmasawnna hmel lanna hrang hrangte a en a, sawrkar Department hotute nen an inkawm nghal bawk.

Mamit DC Conference Hall-a Department hotute a kawmna ah Central Prabhari Officer chuan Mamit District Aspirational District-in hmasawnna kawng a zawh mekah NITI Aayog atanga lawmman dawng chhunzawm zel thei tura tan la tur leh lawmman dawn tawh te atanga hmasawnna hna thawh hrang hrang te chu Mamit District mipuiin tangkai taka an hman theih nana hma la zel turin a chah a. Mamit Aspirational District chuan hmasawnna kawng a zawh zel theih nan department hrang hrang hotute pawh ngun taka ngaihtuah a, Project tha leh tluantling siam thin turin a chah bawk a ni.

He hunah hian Mamit Addl. DC Carolyn L.B Khiangte chuan Aspirational District Mamit a hmasawnna hna thawh tawh leh thlen chinte, tehfung hrang hranga an dinhmun leh Aspirational District chawikanna atana sawrkar laipui atanga tanpuina dawn dan leh a hman dante a lem nen a tarlang a. Mamit District hi tun dinhmunah Delta Ranking-ah 14 na an ni mek a, District chawikanna atana sum dawn tawh chu cheng vbc. 19 a ni a. He thutkhawm ah hian an hmachhawp leh hmabak bakah harsatna awm thei te an sawiho a ni.