A mamawh tana koh theih tur Medical Team dah

Serchhip District pum tana koh theih turin Friends of People chuan East Lungdar khua ah Hrangturzo Bialtu MLA, Lalmuanpuia Punte hmalakna in Medical Team an dah.
Free Medical Centre leh Free Ambulance bultanna hun hi nimin khan East Lungdar BDO Office-ah neih a ni a, Bialtu MLA aiawhin East Lungdar BDO Peter Malsawmtluanga'n he hun hi a hmanpui a, Friends of the People Director David TT chuan an kalphung tur a sawifiah a ni. Mamawh huna mipui ten an koh theih tura East Lungdar-a Medical Team-ah hian Dr. Ruth Lalthasangpuii, Nurse Sawmzeli Renthlei, ANM Zothangluangi, Health Supervisor C. Lalhruaizela leh lirthei khalhtu tur Lalruatsanga te an awm a. East Lungdar chu hmunpui-ah an hmang dawn a. PHC-in an kawlsa Ambulance chhawr tangkaiin khaw hrang hrangah a tulna apiangah an kal kual thin ang.

He hmalakna hnuaia Medical Team dah hi Serchhip District pum atana koh theih tura ruahmanna siam ni mah se, East Lungdar RD Block an vil deuh ber dawn a. Damdawi pawh damlote mamawhna ang zelin he Medical Team hian a thlawnin an pe thin dawn a ni. He Medical Team din tura sum mamawh te hi Oil India Ltd. (OIL) ten an CSR Fund atangin an tum ang.