Damdawi In hrang hrangah Pharmacist dah tum

Health Minister Lalrinpuii chuan Mizoram-a PHC leh CHC zawng zawng bakah District Hospital tinahte Pharmacist dah vek tura hmalak a nih thu a sawi.

‘World Pharmacists Day 2025’ lawmna hun nimin-a Aizawl Vanapa Hall-a neih a hmanpuina ah Health & Family Welfare Minister Lalrinpuii chuan Pharmacist-te pawimawhzia sawiin, “Damdawi siam dan atanga mipuite hnena hralhchhuah dan thlenga thiamna bik nei an nih avangin an pawimawh hle a, Healthcare System hi an tel loin a kal thei lo a ni,” a ti a. Damdawi te chu a nih dan tur ang taka temperature, humidity leh ni eng-ah te vawnthat an nih loh emaw, a ei hun leh ei dan dik takte inhrilhhriat a nih loh emaw chuan a chakna leh hnathawh dante danglam theiin nunna hialin a tuar theih thu a sawi a, damdawi dawr reng reng chu Danin a phut angin damdawi lam thiam, Pharmacist dik takte ngeiin nghakin, an hun pumin damdawi dawr chu an vil vek tur a ni, a ti. Health Minister chuan mipuite harsatna sukiang tura Sawrkar hmalakna te tarlangin, tun dinhmunah Pharmacist 17 (Contract), Assistant Director 3 leh Drugs Testing Laboratory-a thawk tur Junior Analyst 3 lakna tura hmalak mek a nih thu a sawi a. Heng bakah hian Mizoram-a PHC leh CHC zawng zawng bakah District Hospital tinahte Pharmacist dah vek tura hmalak a nih thu a sawi bawk a. Mizoram-a Cancer tam lutuk chhan zirchianna nei tura hmalak tum a nih thu pawh sawiin, Pharmacist-te an pawimawh hle dawn tih a sawi bawk.

Mizoram State Pharmacy Council buatsaih ‘World Pharmacists Day 2025’ lawmna hi Mizoram State Pharmacy Council-a Executive Committe Member F. Lalliantluanga chuan kaihruaiin Khual zahawm nia he hun hmanpuitu RIPANS Director Dr. Sanjay D. Sawant leh Mizoram State Pharmacy Council-a Vice Chairman Dr. H. Lalhlenmawia te pawhin thu sawiin, Mizoram-a Pharmacy zirna College hrang hrang, RIPANS; Laithangpuii College of Pharmacy; Mizoram Institute of Pharmaceutical Sciences; Blessino Pharmacy Institute zirlaite leh Pharmacist hnathawk lai mekte an tel a ni.

World Pharmacists Day hi WHO thawhpui International Pharmaceutical Federation (FIP) huaihawtin kum 2009 atang khan kumtin September 25-ah hian hman thin a ni a, kum 1912-a International Pharmaceutical Federation din ni denchhenin he ni-ah hian hman thin a ni.

Pharmacy Act, 1948 (Sec. 42) a tarlan angin, damdawi reng reng te hi Registered Pharmacist te chauh lo chuan zawrh emaw, hralhchhawn emaw phal a ni lo a, Dan zawm lo te chu Drugs & Cosmetics Act, 1940 Sec. 18(c) leh Sec. 27 hmangin kum 3 thleng lungin tan leh pawisa chawi theihna a ni.