Damdawi In-a kawlphetha harsatna a hmunah enfiah

Health Minister Lalrinpuii leh P&E Minister F. Rodingliana te chuan nimin zing khan Civil Hospital, Aizawl tlawhin tunhnaia power lama he damdawi In-in harsatna an tawh te enin a sutkian dan tur an sawiho nghal bawk.

Heng Minister te hi damdawi In-a thawktu ten lo dawng-sawngin he damdawi In hi Mizoram-a damdawi In zingah mipuite pan nasat ber anih avang leh tunlai khawl changkang chi hrang hrang CT Scan leh MRI te bun anih bakah Dialysis Centre, Operation Theatre bakah ICU ah te power mamawh reng anih thu te, Cath Lab peihfel tep tana power chawl lo a mamawh anih dante an sawifiah a, tunhnaia Damdawi In Generator lian a chhiat avanga power lama harsatna an tawh dan leh mipui damlote nasa taka a nghawng dan te an lo hrilh a ni.

Minister-te chuan Civil Hospital-a power hmanna chi hrang hrang – CT Scan, MRI, Dialysis Centre leh ICU te bakah Operation Theatre te an tlawh a, He damdawi In tana Electric VIP line mamawh anih dan te, Line thar atanga Civil Hospital tana darkar 24 khaihlak lo a power pek dan tur ruahman nghal a ni a. Hemi atana sum mamawh tur te pawh a rang thei ang bera Sawrkar dil an tum thu an sawi bawk. He damdawi In hian Electric VIP line an pawt thei anih chuan power awmloh avanga damlo mipuite harsatna nasa tak thleng thin chu a chhawk zangkhai ngei a beiseiawm nia tarlan a ni bawk.

Hei bakah hian PMJVK sum hmanga Civil Hospital Block A leh Block B sak dan tur tlangpui bakah Trauma Centre a insuan lut tura hmalak ngai thenkhat te pawh a hmunah thlirho nghal a ni a. Power Minister chuan Civil Hospital Compound-a High Mast awm, hun rei tak chhung chhe tawh pawh a rang thei ang bera siam that dan kawng zawn anih tur thu a sawi a, Mipuite aiawhin Civil Hospital hotute chuan lawmthu an sawi nghal bawk a ni.