Chief Minister hovin State Level DISHA thutkhawm neih a ni

Sawrkar laipui hmalakna hrang hrangte State chhunga kalpui dan ngaihtuahzui a vilzuitu, State Level DISHA Committee (Development Coordination and Monitoring Committee) chu nimin khan Chief Minister Lalduhoma hova thukhawmin sawrkar hmalakna hrang hrang thlirho a ni.

Planning & Programme Implementation Department Conference Hall-a he thutkhawm ah hian Chief Minister Lalduhoma chuan DISHA Committee chu a hming put angin Sawrkar laipuiin ram leh mipui hmasawnna atana Scheme hrang hrangte kalpui a nih danah thawhhona ‘Coordination’ leh vilzuina ‘Monitoring’ a ken tel avangin Department ten thawhho an thiam a, a remchanna apianga thlunzawmna (convergence) kalpui a tul thu a sawi a. Department hrang hrangten an hnuaia Scheme an kalpui danah chak zawka hna an thawh tlan a tul thu a sawi bawk.

Nimin-a thutkhawm ah hian Sawrkar laipuiin CeStral scheme sum hman dan leh inpek dan kalphung thlak danglama SNA-SPARSH hman a nih tak avanga harsatna an tawh dan te sawilan a ni a. Central Scheme kalpuitu Department hrang hrangte dinhmun leh harsatna an tawh dangte ngaihthlak a sawiho a ni bawk.

State Level DISHA Committee-ah hian RD Minister chu Co-Chairman niin RD Department Secretary chu Member Secretary a ni a, Member-ah Lok Sabha leh Rajya Sabha MP te bakah MLA thenkhat leh Central Scheme kalpuitu sawrkar Department 30 bawr hotute leh mimal leh tlawmngai pawl aiawh ruat bikte an tel a ni.