Alzheimer vei enkawlna ah intawiawm tul ti

Health Minister Lalrinpuii chuan Alzheimer natna vei te enkawlna kawngah chhungkua, thenawm khaw veng leh khawtlang hriatthiamna leh intawiawm tawnna a pawimawh thu a sawi.

Alzheimer and Related Disorders Society of India (ARDSI), Mizoram Chapter buatsaihin nimin khan Aizawl Chanmari YMA Hall-ah ‘World Alzheimer’s Day, 2025’ hman niin he hun hi Health Minister Lalrinpuii chuan hmanpuiin tunlai khawvel ah mihring dam hun chhung rei tial tialin kum upate pawh an pun zel thu leh natna chi hrang hrangin a tlakbuak thin thu a sawi a. Kum upate’n natna an vei zinga enkawl leh buaipui ngai em em pakhat chu Alzheimer a nih thu sawiin, he natna veite enkawlna ah chhungkua, thenawm khaw veng leh khawtlang hriatthiamna leh intawiawm tawnna a pawimawh thu a sawi a. World Alzheimer’s Day an hman hian Alzheimer chungchang hriatna zau zawk te, a hun taka natna hmuhchhuah leh he natna veite enkawlna tha zawk a thlen ngei a beisei thu a sawi a. Alzheimers hi cancer leh natna dang anga natna chi khat thluaksawng natna a nih thu leh he natna vei te hi enhrang mai lova khawtlang leh mipuiin kan hriatthiam a pawimawh thu a sawi a. NITI Aayog leh ARDSI-te chu Alzheimer veite enkawlna kawngah an thawhho thu leh Mizoram sawrkarin Article 275(1) hnuaiah Alzheimer’s Home a sak mek thu a tarlang bawk.

Alzheimer and Related Disorders Society of India (ARDSI) Mizoram Chapter hian Alzheimer natna sawihona leh natna vei enkawltute zirtirna Seminar leh Workshop te an hmang thin a. Mizoram hmun hrang hrangah MUP, YMA leh Kohhran te nen Alzheimer natna veite chhinchhiah leh tlawhchhuah hna an thawk a, an thihin an ral bawk thin a. Social Media hmangin Mizoram pumah he natna veite chhungkuate inhriat-tawn leh intawiawmna an buatsaih bawk thin a ni. ARDSI Mizoram Chapter-ah hian a duh apiang tan Member a nih theih a. Life Member ni duh tan Membership fee Rs. 1000 a ni a, Annual Member tan Rs. 100 a ni bawk. He natna in a tihbuai chhungte inkawmhona atan ‘ARDSI Mizoram Chapter’ tiin Facebook leh Instagram-ah an awm a. Digital Monthly Bulletin tihchhuah a ni a. Harsatna leh zawh duh neite tan ARDSI Counselor-te Ph. No. 7005983633 leh 9366191341-ah te biak theih a ni bawk.