ADC te tih tet tumna CYLA in an dodal thu an sawi

Central Young Lai Association (CYLA) chuan nimin khan Lawngtlai-a YLA Golden Jubilee Hall-ah thuthar thehdarhtute kâwmin, Mizoram-a Autonomous District Council (ADC)-te thuneihna tih têt leh tihchhiat tumna awm mek an dodal tlat tih sawiin, 'The Forest (Conservation) Amendment Act, 2023' chu ADC-ten an tuar nasat ber tur thu an sawi bawk.

Central YLA hruaitute chuan, Mizorama ADC-te dinhmun chu ngaihven leh buaipui a hlawh fo thin thu sawiin, tûnah pawh an thuneihna laksak a, an dinhmun tih têt tumna a awm mek niin an sawi a, hei hi tha an tihloh thu leh a tawp thlenga do an tum thu an sawi. Central YLA President F. Lalrothanga chuan, ADC-te chu India danpui Sixth Schedule hnuaia din, thuneihna bik-Executive, Legislative leh Judiciary nei an ni tih sawiin, mahni-a ro inrelna leh thuneihna hran nei an nih laiin Mizoram Sawrkar atanga an dinhmun tih têt tuma hmalakna a awm thin chu pawi an ti tih a sawi a. ADC te chawikan leh dawmkan a hneka an thuneihna chhuhsak mek zel an ni chu pawi an tih thu leh thleng nawn tawh lo se an duh thu a sawi a ni.

Thudawnna pakhat chuan tunhnai khan Secretary to the Govt of Mizoram, DP&AR Chairman-na hnuaiah Study Group on Manpower Assessment for Autonomous District Councils chuan ADC pathum a Officers leh Staff-te dinhmun tihhniam a, Officer leh Staff post tam tak paih tumin ruahmanna a siam niin a tarlang a ni.

CYLA hruaitute chuan, The Forest (Conservation) Amendment Act, 2023 Mizoram a hman tura pawm a ni ta chu pawi an tih thu an sawi lang bawk a. ADC-te chu ramri bula awm, Hnam tlem zawk leh dawmkan ngai zualte chenna a nih avangin, he Dan thar hian a nghawng nasa ber dawna an ngaih thu an sawi a, he dan dodaltute hi an thlawp tlat thu an sawi bawk.