CM hovin GAD leh Law & Judicial hmalakna thlirho

Nimin khan Chief Minister Lalduhoma hovin a Department enkawl pahnih General Administration Department leh Law & Judicial hmalakna thlirletna hun hman a ni.

CM Conference Hall-a thirletna hunah hian chawhma lamah GAD hmalakna thlirho niin GAD hnuaiah hian Deputy Commissioner 11, GAD (Main), GAD (Secretariat Administration Wing), GAD (Protocol & Hospitality), GAD (Aviation), Mizoram House 7, Mizoram Information Commission, State Election Commission, Sinlung Hills Council, Sialkal Range Development Council leh Chief Election Commission te an awm a. Heng GAD enkawl peng hrang hrangte hnathawh hi kimchang taka sawi niin Chawhnu lamah Law & Judicial Department hmalakna te thlirho a ni a. Law & Judicial Department hnuaiah hian Advocate General, Aizawl Bench, Advocate General Principal Bench, Govt. Advocate/Public Prosecutor Aizawl leh District hrang hrang, Registrar General of Marriages, Fast Track Special Court (CSS) leh Mizoram State Legal Services Authority te an awm a. High Court leh District Courts te Nodal Department a ni bawk.

He huna tarlan zingah MINECO ram chu Sqm 6,42,676.04-a zau niin Plot 90 a awm tawh a. Plot hi pekchhuah tur a awm tawh lova ngaih niin kumin July thla atang khan Plot thar pekchhuah khapna siam a ni a. District-a Independence Day/Republic Day lawmna senso, District Office hrang hrangin an thawhkhawm thin chu a tawp theih nan sawrkarin Budget Head siamin pawisa dah ve tawh se tia rawt a ni a. District Administration (Deputy Commissioner) ramri mila Department dangte bial enkawl herrem a tulzia tarlan niin zirchian nise an ti a. Tunah hian GAD hian SASCI Fund hmangin project sawm leh pakhat an kalpui mek a, heng zingah hian Construction of General Pool of Government Quarters at Lunglei, Lawngtlai, Siaha, Serchhip, Kawnpui & Bairabi, Construction of Circuit House at Siaha, Serchhip & Saitual te a tel a ni.

Law & Judicial Department hnathawh thlirletna hunah hian tun dinhmunah Mizoram sawrkar khinna Court case 4002 a awm mek thu tarlan niin kumin January atanga August inkarah - Parawise Comment Vet a neih tawh zat chu 566 niin Legislation leh Cabinet Memo kaihhnawih a Vet tawh zat chu 386 a ni a. Department hrang hranga Legal Advice a pek tawh chu 162 niin MoU/MoA a vet-sak tawh zat chu 173 a ni a. India ram Criminal Law tharin a phut angin Directorate of Public Prosecutors din tura hmalak mek a nih thu te; Mizoram-ah Registrar of Marriages 735 an awm mek thu te; June 2024 khan a vawikhatna atan Central Administrative Tribunal chu Mizoram-ah an rawn thut thu leh Mizoram-a a hmasa ber turin tun thla ni 19 khan Serchhip District Court-ah Addl. District & Sessions Judge Circuit Court a hawn thu tarlan a ni bawk.