Minister pahnih ten Vaivakawn Police Station an tlawh

Home Minister K. Sapdanga leh Excise Minister Lalnghinglova Hmar te chuan nimin zing khan Vaivakawn Police Station tlawhin Police te fuihtharna leh hmasawnna tura hmachhawp thenkhat te an sawi.

Vaivakawn Police Station an tlawhna ah hian Home Minister K. Sapdanga chuan Police Station-a tlulut tawh chin chu tanpui ngai tak tak an ni thin tih sawiin, an mamawhna zawna theihtawp chhuahpui thin turin thawktute chu a chah a. “Rangvamual leh Phunchawng te in Bial tel a, Vaivakawn Police Station-a thawkte in hah zia hi kan hriatpui che u,” tiin an Bial chhunga khawtlang hruaitute leh mipuite thawhpui thiam turin a chah a. Police Uniform chuan zahawmna a kengtel tih pawh sawiin, “Kan hnathawhna ah he zahawmna hi vawng a, phochhuak thei turin mimal tinin mawh kan phur a ni.” a ti a. Mizoram hmun hrang hranga Police infrastructure tlabal chu UD&PA Department atangin thawmtha tura hmalak mek a nih thu a sawi bawk.

He hunah hian Aizawl West-II Bialtu MLA leh END Minister Lalnghinglova Hmar pawhin Excise Department, Vaivakawn Siamtha Pawl (VSP) leh Police tangkawpin Vaivakawn-ah Zu leh ruihhlo umbo beihpui thlak a nih thu sawiin, Vengchhunga ngawlvei riakkhawm thinte pawh hnawhdarh thin an nih thu a sawi a. Vaivakawn khawtlang thenfai kawnga hmalaknaah Police in theihtawp an chhuahpui thin chu lawmawm a tih thu a sawi bawk. He hunah hian Minister pahnihte hi Vaivakawn khawtlang hruaitute bakah UD&PA Department Secretary Lalmalsawma Pachuau IRS leh Director Jacob Lalawmpuia ten a tawiawm a ni.