Serchhip Town chhung VC pahnih-a bawlhhlawh lakkhawm dan kalpui mek chhunzawm tlak ah ngai

Kumin August 4 atanga New Serchhip North leh South VC huamchhunga bawlhhlawh tawih thei leh tawih thei lo thliarhranga lakkhawm hna thawh chu mipui ten an zawm thain chhunzawm zel tlak ah ngaih a ni a. He hmalakna Pilot Project-a kalpui hun chhung pawh nakum (2026) January thlaa ennawn tura pawhsei a ni bawk.

Serchhip Town Sanitation Task Force chu an Chairman leh Bawrhsap Paul L. Khuma hovin Serchhip DC Meeting Hall-ah nimin khan thukhawmin thutkhawm hmasa in kumin August ni 4 atanga bawlhhlawh tawih thei leh tawi thei lo mahni In theuha thliar hrang a, a khawn ni bik siam tur leh bawlhhlawh khawnna point bik siam lova a lakhawmtuten In neitute kawtkai atanga bawlhhlawh khawnkhawm hna Pilot Project-a New Serchhip North VC leh New Serchhip South VC huamchhunga an kalpui chungchang an thlirlet a. He hmalakna hi Serchhip khaw pumah kalpui tura rel ni tawh mah se a enchhina leh mipui zirtirna ni pahfawmin Pilot Project angin heng VC area pahnihah hian kalpui phawt a ni a. Nimin-a thutkhawm ah hian Task Force Member te bakah New Serchhip North leh New Serchhip South VCP te leh tlawmngai pawl -YMA, MHIP leh MUP President te nen he pilot project hi a hlawhtling em tih an sawiho a ni.

New Serchhip area-ah hian bawlhhlawh thliarhran chu mipuiin an zawm tha thawkhat hle tih Meeting-ah hian sawilan a ni a, felfai tawk lo lai la awm bawk mahse chhunzawm zel tlakah an ngai a. Village Council President te pawhin bawlhhlawh khawn man te, khawn hun leh paih hun chungchanga mipuiin harsatna an tawh thenkhatte an sawi a. Vantlang bawlhhlawh bawm chungchanga harsatna an neih te pawh sawilan niin Village Council te theuhin hei hi an lo buaipui chhunzawm dawn a ni.

Bawlhhlawh sawngbawl hna hi PPP Mode-a kalpui niin Sawrkar leh Green Herd SP te an thawkho a. Green Herd SP aiawhte chuan bawlhhlawh khawn leh thliarhran chungchanga hma an lak dan tarlangin, Serchhip Town Area chhung mai ni lo, PHE Department kaltlangin Serchhip District chhung thingtlang khaw engemaw zat ah an khawn thin thu an sawi a. Khua leh veng thenkhatah bawlhhlawh thliarhran hi hlawh-tling taka kalpui theih a ni tawh laiin, bawlhhlawh la paih kawp khaw engemaw zat an awm thu an sawi a ni.

He Meeting hian hemi chungchanga uar lehzuala mipui zinga inzirtirna kalpui chu tha tiin Google Meet hmangin tun thla ni 26 khian PHE leh UD&PA Department tangkawpten VLA zawng zawng te zirtir se an ti a. VLA te hian Special Gram Sabha neih ni-ah bawlhhlawh tawih thei leh tawih thei lo thliarhran chungchang hi mipuite nasa lehzualin an zirtir dawn a. He bakah hian PHE Department-a Official ten khaw hrang hrang an fang chhunzawm dawn bawk a ni.

Meeting chuan Pilot Project kalpui hun chhung hi pawtseiin kumthar (2026) January thla ah ennawn leh ni se tiin an rel a. Pilot project bul tan a nih atanga tun thlenga kim lo leh fel lo awm te, hmaih palh awm te siam thaa, felfai leh changtlung zawka Bawlhhlawh Sawngbawl hi Serchhip khaw pumah hlawhtling taka kalpui tha an ti a. A hun tur erawh ngaihtuah nawn leh tura dah a ni.

Tarlan tawh thin angin Green Herd SP, PHED leh UD&PA Department te thawh-honain Serchhip-a bawlhhlawh senghawi tur hian bawlhhlawh sawngbawlna hmun chu Lungrual ramah siam a ni tawh a. Bawlhhlawh sawngbawlna hmunah hian bawlhhawlh tawih thei lo te hi a then tum tel (bale) a siamin, hralh a ni anga. Hralh tlak loh te erawh chu meikhu siam lova halralna khawl (Smokeless incinerator) hmanga halral a ni anga. Bawlhhlawh tawih thei te hi Chhiahtlang dai-a Tualthah Mual-a Dumping Ground-ah paih a ni thung ang.