MNF Party buatsaihin Serchhip-ah Martar te Ni hman a ni

Mizo National Front (MNF) chuan Zalenna suala nunna hlantu Martarte hriatrengna ni, Martar Day chu kumtin September 20-a an hman thin angin Inrinni khan Serchhip-ah pawh hman a ni a, Serchhip bazar Tual-a Martar te hriatrengna lungphun-ah zawhna pangpar dah a ni.

Serchhip East Block MNF kaihhruaia Martar te Ni hman ah hian Martar te zahna pangpar dah a nih hnuah Serchhip Sub-Hqrs. YMA Hall-ah hun hman zui niin he hun hmanpuitu MNF Adviser Robert Romawia Royte MLA chuan Martar te Ni chu MNF Party chauhin an hman thu leh chu chu Political Party dang te nen an danglamna a nih thu a sawi a. Nationalism kengtu MNF chu party dangte nen an inan loh thu leh Nationalism chuan huaisenna, dikna leh changkanna bakah mahni Sakhua-a nghehna te a kentel thu a sawi a. Mizoram-ah kum khat leh a chanve chhung vel chauh Kalphung thar an sawrkar chhungin issue lian tak tak thleng avangin mipuite an beidawn thu leh sawrkarna siam leh turin MNF lo chu beisei an beih loh thu te a sawi bawk a ni.

Serchhip East Block MNF President C. Lalrinfela kaihhruai he hunah hian MNF General Hqrs. a Media & Publication Board Chairman J. Malsawmzuala Vanchhawng pawhin Mizo hnam leh ram tana nunna hlu tak lo hlan tawhtu Martar te zahna chibai bukin, “Kan Vawiin hun atana hnam pasaltha te lo inpek tawhna ropui leh hlutak hi thangthar zel ten kan zah a kan chawi-mawi thiam a ngai a ni,” a ti a. “Tunlai khawvel ah hmasawnna leh changkanna engkim nei chho zel mah ila, kan ram leh hnam hi a him si loh chuan awmzia a awmlo a ni,” tiin Mizoram in ram neitu thinlung pu tu dik tak a mamawh thu a sawi bawk.

Serchhip-a Martar te Ni hmanna ah hian MNF party mipuite leh PAMRA Saizahawla District Member te pawh an tel a. Serchhip District-a khaw thenkhat ah te pawh he ni hi hman niin MNF party-a hruaitu thenkhat ten hun an hmanpui bawk a ni.