Tlabung-a Helipad-ah hun rei tak Helicopter tum tawh lo

Sawrkar laipui-a Ministry of Home Affairs sum cheng nuai 116 vel senga thawmthat leh tih-changtlun, Tlabung-a Helipad-ah hun rei tak chhung Helicopter a tum tawh lo.

Ramri-a venhim hna chak zawka thawh a nih theihna tura hmalakna peng pakhat atan India leh Bangladesh inrina hrul khaw 4-a Helipad chu thawmthata tihchangtlun a ni a, Tlabung-a BSF enkawl Helipad pawh Union Home Ministry sum senga thawmthat zingah hian telin, tun dinhmunah hna thawh tur zawhfel ni tawh mah se, Helicopter tum nan hman a la ni leh lo a ni. 

Tlabung-a Helipad hi kum 2022 kum tawp lam khan thawmthat tan niin tun dinhmunah hnathawh tur ang ang zawhfel ni tawh mah se, Helicopter tum nan hman theih a nih leh nih loh a taka enchhinna, Trial landing mumal tak tih a la nih loh avangin Helicopter tum nan hman theih a la ni lo tih BSF hotute chuan an sawi a, Helipad hrim hrim chu tuna a dinhmun enin Helicopter tum leh thlawhchhuah nan hman theih a ni reng tawha an ngaih thu an sawi a ni. 

Hetihlai hian, Mizoram Sawrkar-a General Adminstration Department (GAD) hnuaia Civil Aviation Wing-a thawktute chuan Tlabung atanga Helicopter service hmanga zin an awm mumal loh thin avangin hunbi mumal tak neia Tlabung a Helicopter Service thin chu tihtawp a nih tawh thu an sawi bawk a ni.