MZP hruaitu ten mawhphurhna an inhlan

Mizo Zirlai Pawl (MZP) General Hqrs. hruaitu thlanna neih a nih hnuah hruaitu hlui leh thar te chuan nimin khan mawhphurhna an inhlan.

MZP Conference Hall, Aizawl-a OB charge an inhlannaah hian President thar Dr. C. Lalremruata chuan kum 2025-2027 inkara an hmachhawp sawiin, Mizo Zirlai Pawl an nih angin zirna leh a kaihhnawih an ngaihpawimawh hmasak ber tur thu leh Mizoram chu kum 15 chhung ziak leh chhiar thiam tam ber State ni tawh mah se Central Service-a inziak tling pakhatmah an awm loh thu a sawi a, ziak leh chhiar thiam ringawt chu hmasawnna a ni lova, thiamna tak tak nei zirlai lehkhathiam hmantlak an awm theih nan hma an la dawn tih a sawi a, Mizo zirlai zawng zawngte hman theih turin Student Aid Fund siam an tum thu leh zirlaiten an zir zawha company hrang hranga hna an hmuh theih nan Mizoram-a a vawikhatna atan Placement Agency te nen thawkho-a hmalak an tum thu a sawi. Mizo zirlai ten nu leh pate thawhchhuah chauh ring a zirna chhunzawm lova Mizoram sawrkar leh India sawrkar bakah Foreign University hnuaia Scholarship hrang hrang awm te hmanga zirna an chhunzawm theih nan hmalak a ni dawn tih pawh sawiin, MZP chu zirlaite tana innghahna tlak a nih theihna tura thawh ho puiah Member te chu a sawm bawk.

Hei bakah hian MZP President chuan Zirlai pawl thianghlim tak an neih theih nan Political party kaihhnawihte inrawlh tawh lo tura ngenin, MZP inthlan neih zawh takah political party leh MLA inrawlh an awm nia sawi chu a zahthlak a, party a awm tawhte chu MZP Election-ah inrawlh tawhlo turin a ngen tih a sawi a, inthlanah ZPM party lineup leh ZPM sponsor awm anga sawi chu thu dik lo a nih thu a sawi bawk.

Tun thla September ni 3-a MZP Assembly vawi 65-na neih zawh taka khan kum 2025-2027 chhunga MZP General Hqrs. hruaitu thlanna neih a ni a, President-ah Dr. C. Lalremruata bakah Vice President atana Sanghmingthanga, General Secretary atan C. Lalhmingsanga, Asst. General Secretary atana Lalentlinga, Treasurer atan Rothanliana leh Financial Secretary atan Nangsawmthanga te thlan niin nimin khan mawh-phurhna hi an la a ni.