National Ayurveda Day 2025 lawmna Health Minister Lalrinpuii hovin neih a ni

National Ayurveda Day 2025 lawmna chu nimin Sept. 23, 2025 khan Health Minister Lalrinpuii hovin Aizawl Vanapa Hall-ah neih a ni.

National AYUSH Mission, Mizoram buatsaiha kumin-a National Ayurveda Day lawmna hi a tum 10-na niin thupui atan, ‘Ayurveda for People and Planet’ tih hman a ni a, he hunah hian Health Minister Lalrinpuii chuan Ayurveda chu natna enkawlna mai ni lovin nunphung chi khat a nih thu leh a thu ril ber chu hriselna vawnhim a nih thu bakah tunlaia nunphung hrisel lo avanga natna pung zelah a la pawimawh zual zel dawn niin a sawi a. Mizoram leilung, sik leh sa leh ruahtui tlak dante chu thing leh mau, thlai leh ramhmul damdawi chi hrang hrangin an ngeih em em nia sawiin, “Heng ramhmul damdawi tangkai tak takte hi humhalh nachang kan hriat a, ramdanga thawnchhuak thei khawpa kan chinpun hunah phei chuan nasa takin hma kan sawn dawn a ni,” a ti. Health Minister chuan AYUSH Doctor leh Staff, Co-Located AYUSH facilities-a thawk mek te, Integrated AYUSH Hospital-a thawk te leh AYUSH Health & Wellness Centre 41-a thawk mekte chungah lawmthu sawiin, Ayurveda chu India-in mihringte hnena a thilpek hlu tak a ni a, Ayurveda hmanga hriselna chu mitin tan a ni a, hrisel taka nung duh apiang tana belhchian tlak, Ayurveda chu chawilara a awm zel a beisei thu a sawi bawk.

National Ayurveda Day 2025 lawmna hunah hian Health & Family Welfare Department-a Commissioner & Secretary H. Lalengmawia IAS chuan inlawmna thuchah sawiin, AYUSH chu sawrkar laipui pawhin a ngaih pawimawh avanga Ministry puitlinga din a nih thu a sawi a. Ayurveda chu a hming avangin Mizote’n ngaina lo mah se kan thlahtute atanga kan ban phaka inenkawlna awm, ramhmul damdawi hmang thin kan ni tih sawiin, a thatzia inhrilhhriat a tul thu a sawi bawk a ni.

Nimin-a he hun hman ah hian Mizoram State Council for Indian System of Medicines (MSCISM)-a Registrar Dr. V. Malsawmpuii chuan Ayurveda chungchang hmelhriattirna thu sawiin, Dr. Laltlankimi Ralte, Medical Officer, AYUSH, Civil Hospital, Aizawl leh Dr. VL Remruati, Medical Officer, AYUSH, Lengpui CHC-te atangin case presentation ngaihthlak a ni a. Dr. Zonunsiama, Joint Director, Planning H&FW chuan lawmthu sawiin hun a hmang bawk a ni.