Govt. Serchhip College in Quiz-ah lawmman 2-na dawng

LESDE UPSC Challenge Inter College Quiz Competition 2025 neih zawh takah Govt. Serchhip chu pahnihna an ni.
Mizo Students' Union (MSU) General Hqrs. buatsaih ‘LESDE UPSC Challenge Inter College Quiz Competition 2025’ hi Inrinni zan khan Aizawl Khatla-a Ignite Studio-ah zawhfel niin Final Round-ah Govt. Serchhip College bakah Govt. Hrangbana College leh Mizoram Christian College te an inhmachhawn a, Govt. Serchhip College aiawha tel Lawmsangzuala leh Lalhunmawii te chu pahnihna niin point 80 an hmu a, Lawmsang-zuala hi ‘Best Quizee’ a ni bawk. He intihsiakna a pakhatna ni ta Mizoram Christian College (MCC) (Rohmingliana Renthlei leh Remsiamkima) te chuan point 100 an hmu a, Govt. Hrangbana College (Lalruatfela leh Lalbiakfela) chu pathumna an ni bawk. He intihsiakna a pakhatna hian lawmman ah Citation leh Rs. 30,000/- dawngin pahnihna in Citation leh Rs. 10,000/- an dawng a, pathumna hian Citation leh Rs. 7000/- dawng bawkin Champion Team-te hian Mizoram Youth Commission (MYC) hnuaia Mission UPSC kaltlangin a thlawnin UPSC Coaching an kal thei dawn a ni.

Inrinni zan-a ‘LESDE UPSC Challenge Inter College Quiz Competition 2025’ kharna hun hi LESDE Minister Lalnghinglova Hmar chuan khuallian nia hmanpuiin UPSC Challenge Quiz Competition buatsaih a ni chu lawmawm a tih thu leh Mizo thalaite’n UPSC hnuaia exam hrang hrangte hmachhawn tura chawhphur an ngaih thu a sawi a. LESDE Department hnuaia Mizoram Building & Other Construction Workers Welfare Board (MBOCWWB) chu mipuiin an hriatchian a, an inziahluh a, a hnuaia hamthatna an dawn theihte an hlawkpui theih nana he quiz hi an sponsor thu leh thalaite’n eizawnna rahbi an tuk theih nana an puihbawm thin thu a sawi bawk. MSU hian kum 2015 atangin UPSC Challenge Quiz Competition hi a lo buatsaih tawh a, kum 2023 leh 2024 te an chawlh hnuah kumin hian an chhunzawm leh a ni.