Chief Minister Lalduhoma’n BSF hna lak kal mek ngaihven turin Mizo tlangval te a sawm

Mizoram District hrang hranga cheng thalaite tan Border Security Force (BSF) General Duty tur mi 300 lakna chu kalpui mek a ni a, Chief Minister Lalduhoma chuan BSF sipai lakna hi Mizo thalai ten beisei angin an bengkhawn tawk lo nia sawiin, Mizo tlangval chu ngaihven turin a sawm a ni.

BSF Sipai lakna hi tun thla ni 23 atang khan Mizoram District hrang hrang tan buatsaih niin Centre pathum-ah sipai lakna hi neih a ni a, hemi chungchangah hian Chief Minister Lalduhoma chuan BSF recruitment kalpui mek chu Mizo thalaiten beisei angin an bengkhawn tawk lo hle a a hriat thu leh pawi a tih thu Social Media kaltlangin a sawi a. Ramri veng tur, ram tana ngaihtuahna seng mi, ram hmangaih mi an luhna atana an duh a nih thu sawiin, Recruitment chu kalpui mek a la nih avangin Mizo tlangval te chu he hun remchang hi hmang tangkai tura a duh thu a sawi a ni.

Thudawn danin tun tuma BSF Sipai lakna turah khan Sept. 18 thleng khan Serchhip Centre-ah chuan inziaklut mi 1248 an awm a, an zingah hian hmeichhia 217 an tel a ni.

Chief Minister chuan Mizo hlang Battalion, Territorial Army neih a nih dawn thu leh recruitment pawh tih tep a nih thu sawi bawkin, Aizawl leh Lunglei-a recruitment huaihawt turin Company khat ve ve an rawn luh tawh thu leh Champhai-ah Company khat awmna tur ngaihtuah leh mek anih thu a sawi a, Territorial Army atan hian a tirah Battalion din nghal thut theih a nih loh thu leh a tirah mi 150 lak phawt an nih dawn thu sawiin, hemi hnuah hian hmeichhe tan pawh an la dil zui zel dawn thu a sawi a ni. 

Chief Minister chuan Territorial Army chu Battalion puitling la ni chho tur, an awmna hmun nghet tur pawh la ngaihtuah zel tur a nih thu te, ramri hrula duty tur, thu pawimawh te lakhawma sawrkar Mit leh Beng ber tur an nih thu leh an pawimawh thu a sawi a. Thalai tha tak tak thawk thei tur an awm tih a hriat thu leh thahnemngai taka ngaihven ngei tura a duh thu a sawi a ni.