Poshan Maah denchhenin ‘Plantation Drive’ neih a ni

Rashtriya Poshan Maah 2025 hman mek pualin Inrinni khan Serchhip-ah ‘Plantation Drive (Adopt a Tree)’ Programme hmangin thingtiak phun sa tihfaina hun hman a ni.
National Nutrition Month (Rashtriya Poshan Maah) 2025 hman mek denchhena ‘Plantation Drive (Adopt a Tree)’ hun hi Serchhip ICDS Project bultumin Serchhip Bazar-ah Royal Riders, Serchhip te nen hman niin he hunah hian Serchhip ICDS Project-a CDPO Caryll Lalpari chuan kan khawvel in kawng tam taka hma a sawn mek laiin kan boruak erawh a chhe tial tial tih sawiin, hei vang hian boruak tha kan neih zel theihna turin thingphun leh enkawl zui kan ngaih pawimawh a tul thu a sawi a. Tun tumah hian Serchhip-a Environment humhalhna kawnga hma lo la tawh thin Royal Riders te nen an thawkho thei chu lawmawm a tih thu sawiin, thingphun hmanga kan Environment chhe mek zel titha leh tura hmalak a pawimawh thu leh chumi atan chuan he hun hi an hman thu a sawi a ni.

He hunah hian Serchhip ICDS Office Staff, Calvin Lalngaisanga kaihhruaiin kalkhawm ten he ni puala thutiam an chham rual a, hemi hnu hian Royal Riders te hi Serchhip CDPO hian vailiamin Serchhip leh Thenzawl inkar-a thingtiak phun an tifai a, thingtiak 20 te chu Royal Riders te hian an adpot a ni.